電玩界中，論創意任天堂必定屬於一等一，每每有唔少驚喜，最新推出GBA遊戲《旋轉MadeInWario》更係新奇之作，遊戲不會使用十字掣操作，純粹感應GBA傾斜角度與方向來玩，所以當喺街見到人拎部GBA左搖右擺一啲都唔使出奇，呢個係最新嘅機迷格。
記者：許福合
攝影：周旭文
ImageGirl：Zoe
此遊戲之所以會令人左搖右擺，係因為配件之中包括一個感應傾斜度感應器，安裝方法好簡單，感應器連接盒帶，只要插入GBA即可。操作方法更同一般GBA不同，最大特色完全不用十字掣，單靠感應器控制操作，例如GBA嘅傾斜角度、震動甚至旋轉方向都會反影響遊戲內，另外亦會保留A/B鍵以方便作選單之用，所以要在GC上玩此新Game就有啲難度，除非你將部GC拎起左搖右擺！另外，配件還附有震動功能，會隨玩家選擇作反應，感覺上好似揸個手掣咁，暫時就唔知會否因而食電咗，不過玩時動作會好大，因為隨GBA傾斜，玩家又會自自然然傾斜以觀看畫面，咁打機都幾趣怪！
有玩過之《Atsumare!!MadeinWario》玩家，應會相當熟悉遊戲玩法，變嘅只係操控方式，而今集遊戲更超過200個，個個都有特色，唔追求畫面完美，但以可玩性已相當可觀，其實耐玩先至係最重要，其中幾個更係玩唔嫌，首選一個左右搖剃鬍子，非常好玩，其他如切蘋果、玩貓都值得推薦，不過因為遊戲太多，筆者未有時間全部玩晒，相信仍有好Game隱藏其中，不過留意因為每個遊戲並未有教學，有時會唔知玩咩嘅感覺，要玩家自己摸索一下。
相信各位玩GBA時間，最多係等人、等車或者搭車時候玩最多，無論喺個Game內打得幾咁激烈，都唔會影響到其他人，不過呢隻《旋轉MadeInWario》相信各位更改改玩Game習慣，根據筆者玩過嘅經驗，此Game絕對唔適合喺旁邊有人或多人嘅地方玩，玩時經常左搖右擺，時前時後，好容易被隔離誤會，所以都係適合搵個人少少地方打餐飽好。另外，整套配件加上GBA遊戲雖然唔少算好重，不過長時間玩，「運動量大」都好累吓，記得要定時休息。
實地試玩過後，發覺感應器頗為敏感，遊戲真係好考究傾斜角度，想要攞高分一定要預早熟習。筆者喺「麥記」試玩時，由於動作頗大，無可避免地引嚟好多師奶、小朋友嘅目光，若果喺地鐵度玩嘅話，相信都幾異相！
對應機種：GBA
遊戲類型：動作
遊戲人數：1人
開發商：任天堂
(C)2004Nintendo
售賣點：DreamStore
電話：25753285
