竇唯日前接受內地傳媒訪問，佢講起前妻王菲時，佢話喺王菲下張碟，佢哋有可能合作，竇唯話：「我們一直有音樂上的聯繫，但是還沒定，一切看情況，這種合作需要默契，需要溝通和交流。」
其實再同王菲合作，竇唯都驚惹是非，因為佢一直認為同王菲分開係某啲人精心設計嘅陰謀，佢話：「到今天我還是認定我這種猜測，整件事從頭到尾都是陰謀，至今還在繼續。香港的某些公司太老到了，和他們相比我們都太幼稚。雖然感情的事不可能勉強，但是他們會讓某種契機出現，而促成整件事，然後讓人不由自主地向那個方向走，一切布置得非常縝密，讓人無法察覺，最後我就被千夫所指，喪失一切發展潛力。」
對竇唯暗示阿菲身邊人破壞佢哋嘅婚姻，王菲經理人陳家瑛噚日喺電話中說：「我唔係好信竇唯咁講嘢，阿菲下張碟已開始收歌，但未知會唔會用竇唯嘅歌。」
周潤發接受商台節目《講古星期天》嘅電話訪問，佢話自小喺南丫島長大，到今時今日重好懷念以前童年嘅日子，特別鍾意耕田嘅感覺，當啲米成熟時，黃昏嘅光照落稻田上面，加埋啲牛同風吹，個感覺好似金海咁靚，所以近年佢都會返南丫島掃墓。
余慕蓮、白茵、雪妮、馬海倫一班甘草藝員，噚日喺醫管局大樓做咗個「美麗更年期」時裝騷，啲衫係鄧達智設計，估唔到觀眾嘅反應咁好，尤其係余慕蓮行騷時，掌聲特別勁，不過個騷主題本來係同女人更年期有關，但可能佢哋個個身材都咁正，搞到講嘅話題變咗圍繞瘦身，馬海倫重猛咁教人點減肥。
任葆琳噚日以柯德莉夏萍造型喺銅鑼灣行騷，上個禮拜五係佢嘅生日，佢話足足慶祝咗成七日，佢喺正日嗰晚去BBQ，順便玩碰碰車，點知樂極生悲搞到隻腳拗柴，佢話為咗噚日嘅鞋騷，所以唔敢睇跌打醫生住，要忍住痛咁擺靚甫士喎。
台灣歌手張震嶽正在美國巡迴演唱，今日中午會喺紐約演出，竟然惹來台獨人士揚言要去會場抗議，原因係阿嶽身為台灣原住民，喺美國卻自稱Chinese（華人），而非Taiwanese（台灣人），台獨分子就上網留言勁鬧佢，話佢冇骨氣。阿嶽就話：「我在做音樂交流，別把我們的工作泛政治化。」
張惠妹前晚喺台灣嘅華納威秀出席完活動後，就直接同阿媽喺嗰度食飯，對於媽咪難得嚟到台北探佢，佢就好孝順咁話要為家人準備一趟旅行，唔理荷包大出血，都要滿足家人喎。
阿妹相當珍惜同家人相處嘅時光，食飯期間有歌迷向阿妹攞簽名，但佢都婉拒，唔希望被打擾。
由邵逸夫同方逸華主理嘅無綫，新聞部早幾日大地震，總監羅燦、高層謝彩雲同張志剛齊齊遞信辭職，盛傳佢哋因為唔接受上層要求裁幾十人而離職，而馮仁昭聽聞除咗新聞部之外，其他部門都有瘦身行動，上星期管理層已經落柯打，要求多個部門主管喺今個星期交一至兩個裁員名單，否則就由人事部嚟決定炒邊個。
