澳門賭業概念股熱炒一輪之後，終於見新濠國際（200）首先跑出搞配股，雖然新濠過去1個多月股價累積升幅巨大，加上集資金額成幾億銀咁多，但聽講今次批股貨源盡落專門投資賭業的美資基金手上，分分鐘新濠股價高處未算高，升到你唔信。
新濠9月初股價由2.30元起步，一條氣係咁升，近排最高見過7.70元，隻股在上周五停牌，透過德國行按每股5元至5.20元配售7590萬股，集資超過4億元。經紀黃話，最終以上限5.20元定價，反映新濠批股受歡迎。
小初記得，上次晶門科技（2878）策略性股東減持舊股，同樣係由德國行操刀，之後晶門股價不知企得幾硬淨，至於今次新濠是否如經紀黃講得咁好，相信好快就知道。
另外，同樣具有澳門賭業概念的澳門實德（487），市場又再傳出可能批股。但經紀陳話，人哋好似未有咁快搞住，可能重要等一等。澳門實德近排最高炒過上去0.78元，但上周中段開始回落，上周五再跌5.97%，收0.63元，成交股數570萬股，金額364萬元。
慕容小初