劉永父親因中風導致左邊身癱瘓，近年他的病況一直反覆，本月初劉父入住律敦治醫院，在住院期間手腳被五花大綁，劉永與家人對此感到憤怒，斥醫院不理病人感受，並保留法律追究權利。
劉永父親三年前中風導致左邊身癱瘓，這幾年更因中風的後遺症要不斷進出醫院，已九十多歲的劉父今年六月出院後，本月初又再度入住灣仔律敦治醫院療養。劉父需要插管進食，但院方指劉父會自行拔管，所以將其手腳綑綁，此舉引來劉永和家人不滿，昨日劉永透過本報投訴。
前日劉父病情轉趨惡化，家人一度已作最壞打算，並安排神父到醫院，劉永昨日說：「今次我爹哋入嚟都係療養吓，諗唔到病情重惡化咗，我覺得呢間醫院真係幾唔負責任，我哋早已經話畀院方知，我爹哋手腳唔可以綑綁，如果唔係佢啲皮膚會紅腫同變黑，點知院方一樣綁晒佢手腳，我哋作出投訴，佢當我哋面解開之後，第日我家姐或弟婦嚟到又見佢俾人綁。」
劉永續說：「我覺得醫院好離譜，爹哋已經半邊身唔郁得，咁醫院使唔使雙手雙腳都綁埋？重有佢左手中風後已經彎曲變成L形，但醫院重夾硬將佢隻手扯番直嚟綁住，究竟院方有冇了解病人嘅情況？」
劉永透露雖然院方已七日沒有再綁其父，但鬆綁後劉父病情急轉直下，劉永說：「俾人綁完，爹哋手腳都黑晒，又連續幾日發燒，我同屋企人呢兩日都喺醫院唔敢走開，由於爹哋情況咁壞，院方都有盡力搶救，𠵱家情況總算穩定落嚟，但我哋依然好痛心，畢竟一個九十幾歲老人家，何必重要佢受啲咁嘅痛苦？我希望院方以後可以多關心病人情況，雖然喺呢次事件，護士長有道歉，但我哋認為唔係一句道歉就了事，我哋對院方會保留法律追究嘅權利。」
記者昨日到律敦治醫院了解情況，當值的護士說：「負責照顧劉父嘅醫生同護士都唔喺度，所以好難同你解釋問題所在，但我哋院方已就呢件事，同佢屋企人解釋過㗎啦！」
採訪：陳月媚
攝影：娛樂突發組
