上周五港股冇再跌，恒指考驗萬三失而復得，上周五美股冇事。港股短期可以睇番好少少。
中電信C輪：中國網通上市，已有好埋門消息，好快路演，下月4日至9日招股，16日掛牌。網通招股，中電信（728）PE係佢嘅8折至85折，贏晒。中電信喺網通招股前硬硬淨淨，對網通定招股價都有着數，中電信未來幾個星期推上去，確係有誘因也。上周五收市嗰陣花旗掛買盤2.475元大約40球，可能內有玄機，唔知花旗有冇直接或間接幫網通搞上市。
等網通招股，等中電信升上去，揸定中電信C輪冇蝕底，冇乜得揀，最正路嘅係4499，數據載喺走勢圖裏面。
國壽C輪：上周一推介國壽C輪2143，推介後由0.27元升上0.31元，上周後期最低20.7仙，收22.1仙。出入拿揑得唔準，大閘蟹唔使買，自己做咗現成嘅。上周五平保（2318）彈升，國壽（2628）有機會受到帶動，2143有機會收番多少失地。
隻輪明年1月到期，溢價9.5%，槓桿率22.4倍（有效9.3倍），引伸波幅34.5%，諸輪中，數據最靚嘅係佢。
唔怕口乾想食鹹魚，賭9231，輪價35.5仙，平水咁滯（0.1%溢價），槓桿率13.9倍，實際槓桿率相差唔多，正股上落2%等閒事，賭9231賺蝕兩成以上亦等閒事，留意最後買賣日係下月4日。
中企C輪：國企指數成份股有幾隻重秤貨個勢向上，對國指有利，可以諗吓短炒中企指數C輪，正路之選有2139同9962。
章盛