炒家近排好似「水銀瀉地」咁，四出掃貨，大炒特炒，上環信德中心重誇張到有炒家叫業主賠定，將單位賣畀自己，再喺市場度摸售。
信德中心西翼一個二五四九呎單位，原業主本來同買家達成出售協議，呎價四千一百二十蚊，點知兩個拜禮後有炒家出價每呎四千五，原業主梗係賠定再賣啦，執多一百萬喎。
聽講接手嘅炒家轉頭就放盤，叫價每呎五千二，若果上會前成功搵到買家接貨，每呎賺七百蚊，利潤係一百七十八萬，由於係摸貨，所以好和味㗎。
中原高級營業經理李百堅表示，信德中心呢排多咗好多短炒個案。
樓市呢排生猛番晒，代理行梗係大豐收啦，美聯物業主席黃建業表示，今個月會派獎金畀合資格嘅後勤員工，最高係三千蚊。美記𠵱家有近三百五個後勤。
今次嘅獎金係以生意額、員工出勤同工作表現嚟釐定，咁收得少嘅後勤就要努力啲嘞。
另外，為咗鼓勵前線代理做多啲生意，第四季頭十個成績最好嘅員工，同首五個主管，都可以攞到一個足金金幣。
代理行見市旺，又再計劃大事擴充，搞到人手短缺。聽講，中記精英會原定訪京，都因為樓市勁旺，決定取消，等大家專心努力𢱑銀。咁你話市況係咪好熾熱嘞。
以前樓市未咁好景嘅時候，代理行不斷舉辦課程，提升夥計競爭力，𠵱家正好派上用場，但以後重有冇時間開辦呢類課程呢？定係開咗都冇代理肯花時間讀呢？
九成半按揭實施後，買家用樓價五個巴仙就可以置業，有能力買樓嘅人大增，再加上投資或投機者大量入市，短時間即搞到樓市熱火朝天。
蘭西日前睇到個廣告，都係推介九成半按揭，不過，唔關香港樓事，係英國倫敦物業市場。推出呢項付款辦法嘅係滙豐銀行，喺香港登得廣告，對象梗係香港人啦！
細睇原來呢個按揭計劃，都幾靈活，可以有七種貨幣揀，利息按日計算。而選用英鎊承造樓按，供款年期有二、三、五同十年，用浮息就保證唔會超過英國嘅基本利率加一厘。呢個九成半按揭計劃，會唔會吸引港人炒埋英國樓呢？
政府拍賣兩幅市區地王，以超高價售出，二手住宅業主個個都心雄，封盤同反價個案大量湧現，買家有時要追幾次價至買到樓。
一名投資者舊年以近百九萬，一手買入將軍澳蔚藍灣畔五座高層B，六五七呎，最近以二一八萬放盤，眼見賣地成績理想，即時反價，重連反三次㖭，難得個客仍然肯追價，終於以二三二萬成交。雖然業主反咗三次價，計落只係加多十四萬，幅度六點四巴仙，都唔算離譜。
利嘉閣區域董事徐志華話，蔚藍約有百四個放盤，業主喺賣地後一般反價一成。
蘭西
電郵地址：
