陶大宇回巢無綫後首部主演的劇集《青出於藍》，雖然平均收看觀眾人數高逾二百萬，惜風頭卻被《金枝慾孽》全面掩蓋，大宇表示以前曾嘗過收視冠軍的滋味，如今只是「自己受番」，而且他入行二十二年歷盡高低潮，所以敢說：「我輸得起！」
陶大宇回巢無綫後先後拍了《青出於藍》及《心花放》兩劇，而年尾亦將開拍新劇《開心賓館》。大宇自回娘家後，首部參演的《青》劇，上周平均收視有三十一點，即約二百零三萬觀眾捧場，成績本來不錯，惜時不與我，撞正由鄧萃雯、佘詩曼、張可頤及黎姿四位女將孭飛的《金枝慾孽》瘋魔全城，令《青》劇風頭全被蓋過。
大宇日前在銅鑼灣接受本報訪問時，對此說：「某程度上公平嘅，掉番轉頭，我都試過，邊個撼埋嚟都係咁樣（指九五年連播兩輯由他主演的《刑事偵輯檔案》例必跑贏），𠵱家自己受番囉！《青出於藍》當畀我熱身，對我嚟講就盡咗力，positive（正面）嘅，起碼唔會失禮。」
當年《刑》劇創下九五年無綫劇集收視之冠，大宇被封為師奶殺手，現在陳豪卻被譽為新一代師奶殺手，於是外界又將二人比較，大宇說：「師奶殺手呢個名由頭到尾都係人哋話嘅，可以同當時得令嘅小生相提並論已經贏咗，人哋重記得你喎，好難得㗎啦。好事嚟㗎，至少啲人一講呢四個字就諗起我。」
問到對陳豪的感覺，大宇說：「佢好有潛質，但同佢拍完《心花放》時，覺得佢太攰，佢絕對要時間休息、洗腦，但冇辦法，身不由己，自己都試過長年累月冇覺瞓，冇咗自我，每個演員都經歷過呢個階段，佢都要好好享受呢一刻。我愈嚟愈覺得機會對藝人好重要，正如我頭先話《青出於藍》被其他劇嘅風頭蓋過，對我嚟講都係一個機會，有啲人想拍都冇得拍呀。」
問大宇現在是否仍輸得起？他即自嘲道：「我輸得起！輸慣咪冇嘢囉！我輸得最甘係《影城大亨》同《縱橫天下》，有好多問題嘅，好似《縱橫天下》，觀眾唔鍾意我染金毛，角色奸淫擄掠、打家劫舍、衰到貼地，啲人接受唔到，計錯數囉，電視同電影唔同，一下子做到咁衰好難令人接受。」
大宇由當年的收視冠軍，急跌成亞視劇集收視的「單位」領導人，對於這樣的大起大跌，他也說：「嗰時收視變成咁，真係好恐怖，冇辦法啦，我都搏㗎，拍《縱橫天下》時，我親自喺船頭跳落嚟，五樓咁高呀！結果成績係幾失望，但唔緊要，大家好似馬拉松咁重跑緊，睇自己造化啦，你夠膽話我啲劇唔得咩？我都唔夠膽話係實得喎，未派彩都未知邊個係冠軍。」
大宇續說：「我記得拍嗰套劇時，有日喺化妝間撞到劉松仁，我順口講咗句：『咁早收工呀？』佢就同我講：『大宇，早收工唔係好事，珍惜機會呀！』呢句話我到𠵱家都歷歷在目，我睇好陳豪㗎，外形唔輸蝕，行出嚟高高大大，佢只係太攰，有啲力不從心。」
大宇入行二十二年，做過路人甲乙丙、又拍過三級片、做過收視冠軍，又試過直插谷底，所以他說：「我覺得自己經典㗎，乜都試過，好似揸越野車咁，有時行草地、有時又行沙地、泥地，又去吓城市，但個偈重有油，唔撞車嘅話實到終點，除非架車冇油，係咪第一個過終點我唔知，但我都會過到，中途爆胎就冇得講啦。」
