新世界數碼（276）、新世界信息（301）及新世界移動（862）純官系3隻電訊業相關股仔，最前一隻新數碼，虛中有實，可以扒冷。
新數碼主營MMS、WAP及IVR等流動通訊增值服務。呢期所見，同類股有中信21世紀（241），大家暫時都係冇PE睇，但中信21世紀已經炒到飛起，主要因為IVR呢個新興服務，係市場憧憬焦點，新數碼涉及同一個題材概念，股價顯然最落後。今年7月，新數碼宣布20合1，家陣每股資產值講緊0.78元，資產折讓6成，重有新數碼家陣控有金鐘美國銀行中心地庫及地下權益，呢項物業權益，唔講得上大堆頭，但勝在夠質素，新數碼夾住IVR概念同美銀中心資產，虛中有實，見有異動，daytrade無妨。
保興（263）上星期五以7.8萬元成交額，鋤咗8%落嚟，沽壓細到無倫，趁有低位，又係可以扒冷。保興04年中期純利大升6倍到266萬元。中期所見，以新增河南省電廠業務最突出，為保興額外提供上500萬元溢利，另一家同處河南省電廠，計劃今年底投產，照計數，明年表現會更好。
最過癮係，保興有一批4000萬元可換股債券，到今年10月到期，換股價0.5元，現價0.177元，相對換股價有折讓。即係話，未來9個交易日，會有個短線藉口，兼有個好實在模擬目標價。又假定保興再融資，排除有換股呢回事，呢隻股，每股資產值0.43元，炒資產折讓，又係賣點。
錢雋