人在台灣講嘢零舍放
馮仁昭四圍超：許鞍華捧趙薇勁踩舒淇

馮仁昭以為淨係得香港藝人去到台灣先講真話，估唔到連香港嘅導演都有呢個習慣，話說許鞍華前日去咗台灣應當地鬼魅影展邀請出席座談會，話明係鬼魅影展，梗係會講吓佢套鬼片《幽靈人間》啦！講開呢套片，許導演就好似有啲唔係好開心嘅經歷，原來係嚟自女主角舒淇。

情緒不穩定
許鞍華前日話：「舒淇外形好、身材好、人聰明，但在拍戲時好像有感情困擾或是私人問題，在片場的時候情緒非常不穩，態度很不好，有點讓人摸不清。」
反而之前曾經同許導演合作《玉觀音》、被傳教唆打人嘅趙薇，許導演就對佢讚不絕口，話趙薇好和善，相信打人嘅事一定另有內情。
其實許導演都係女人，佢應該明白女人嘅感受，舒淇同佢合作嗰陣，唔知係咪因為同黎明嘅感情問題而情緒不穩，而趙薇同佢合作嘅時候正值熱戀當中，咁就梗係和藹可親啦！

湯君年周四出殯
著名電影人徐楓嘅丈夫、湯臣集團老闆湯君年日前病逝，喪禮定咗今個禮拜三喺香港殯儀館設靈，第二日出殯。喪禮會用佛教儀式，遺體火化後，骨灰下月四日會運去上海安放。湯臣嘅台北公司噚日開始布置靈堂畀親友聽日去弔唁，湯君年生前好友連戰都傳真慰問。

伊能靜低胸開幕唔講家事
伊能靜前晚喺台灣出席名店開幕，佢一身性感打扮，十分搶鏡。不過佢就避談姊夫俾台灣警方要求協助調查嘅事，伊能靜用國語話：「我姊夫這件事是不可抹滅的事實，但這是社會案件，我還沒想清楚怎麼說，等過兩個月再說。」

陳志雲指俞琤真係跌眼鏡
方力申前晚主持最後一集港台節目《夢想配方》，訪問無綫高層陳志雲。佢問陳生同俞琤咁熟，覺得俞琤之前同鄭經翰嘅爭拗處理成點？陳志雲話：「佢個人好真，但電視成日播佢跌眼鏡嗰幕，可能佢真係有少少跌眼鏡，但我好支持佢。」

金雞影后暗踩章子怡
上屆金雞獎最佳女演員餘男同內地名導演何平等，前晚出席《中國西部電影展開幕酒會》，餘男話好欣賞張曼玉同梁朝偉，講到章子怡成日因為英語問題出洋相，餘男就似有弦外之音咁話：「語言不是大問題，人做好，電影拍好才是重要。」

王菲台個唱掀撲飛熱
王菲下月二十七日會喺台灣舉行一場演唱會，主辦機構噚日開始賣票，歌迷一早已經去咗排隊，而排第一嘅歌迷上周四就開始喺度等。短短三十分鐘，三百張附送紀念郵票嘅VIP飛全部賣晒，而網上重將啲飛炒到一千五百元港幣，認真巴閉。