港大逾百年歷史，乜嘢都經歷過，所謂太陽底下無新事；不過校長徐立之噚日喺港大一連兩日嘅開放日做嘅嘢，又確係別開生面，虧啲宣傳人員諗得出，就係喺校園大派冰淇淋。
唔好諗錯隔籬，只不過係真嘅雪糕，重要係校長同大學高層親手𢳂嘅雪糕；唔通大學招生競爭咁大，連校長都要出招？
身穿綠色圍裙嘅徐校長就解釋，外國都好興由校內高層派嘢畀啲師生，「呢啲係校長同學生、社區嘅親民關係。」活動個名叫「給您最好的」，噚日好多預科生都去咗港大睇吓，港大係咪乘機暗示自己係「最好的」？定係派嘅雪糕係「最好的」？校長就即刻話：「其實派水都得。」佢重話曾經喺外國嘅兒童醫院做過，當時派過早餐同午餐㖭。
排頭位攞到雪糕嘅七歲小朋友徐韵豐同十歲嘅徐韵揚，話雪糕唔係咁啱佢哋口味；校長又好熱情咁親手請八方嘅行家食，但因為鏡頭對住冇人敢接，八方只好出手，以免校長難落台，但講真，杯雪糕幾好味。
入學講座吸引咗大批中學生，部份學生擔心自己成績得六個A，唔知報唔報到港大！港大教務長韋永庚就解釋：「最多叻人嗰科都有成績一般嘅學生，所以今年喺港大網頁公布咗每科新生成績最好同成績一般嘅資
<