日前剛被雜誌拍得與Cookies成員Stephy在台灣約會的陳冠希（Edison），前晚在上海帶醉出席時裝派對時，一向極有女人緣的他無論走到哪裏，都吸引大批女性向他搭訕，有如螞蟻摟蜜糖，而Edison亦來者不拒，與眾女咬耳仔密密斟，玩得十分盡興。
向來異性緣極佳的陳冠希入行以來緋聞不絕，先後與Twins成員鍾欣桐、陳文媛（BoBo）及2R成員Rosanne等傳緋聞，近日他更被雜誌拍得與Cookies成員Stephy在台灣約會的照片。而Edison前晚現身在上海威勝片場舉行的CalvinKleinJeans派對時，亦吸引大批女士向他搭訕，而香港名模周汶錡、陳嘉容和台灣男星陳柏霖亦有出席。
Edison前晚以一貫的hiphop打扮示人，隨行的除了助手外，還有兩名身形魁梧的外籍保鑣，而他甫抵埗時行起路來已搖搖晃晃，明顯帶醉意，記者趨前欲與他做訪問時，Edison即不悅地說：「乜要做訪問嘅咩？」然後便大步走到ＤＪ控制台，其後又步向ＶＩＰ區域避開記者。
當Edison走向ＶＩＰ區域時，場內大批女性均蜂擁跟隨，而Edison對於被眾女包圍看來十分受落，一一與她們咬耳仔密密斟。其後Edison終肯接受訪問，並向在場記者道歉。
問到他被拍得與Stephy在台灣約會一事時，Edison說：「我兩年冇喺台灣出碟，今次係去傾製作嘅事，我同Stephy係朋友啫，嗰晚我哋有成六、七個人一齊，但係鏡頭又淨係影到我哋兩個。」問Edison覺得與Stephy有沒有發展機會？他答：「我冇諗過呀。」提到他剛在派對內被一眾女士如螞蟻見蜜糖般包圍，豔福無邊一事，Edison笑說：「唔係淨係女仔摟埋嚟，重有男仔㗎，可能因為我係藝人身份啫。」問Edison是否認同自己極有女人緣？他說：「我由細到大都係咁，屋企有三個女人，媽咪同兩個家姐，我都慣咗㗎啦。」談到現時的感情生活，Edison說：「我都想快啲搵番個女朋友，可惜搵唔倒啫。」
另一方面，BoBo昨日與胡杏兒及馬德鐘等，齊到香港專業教育學院黃克競分校為無綫新劇《情迷黑森林》拍外景。對於陳冠希被拍得與Stephy同遊台灣一事，她明顯有備而來，一見記者即說：「入正題喇！冇話信唔信嘅，佢兩個都係我好朋友，如果呢個報道所寫嘅係真嘅，都好正常，我冇打畀佢哋問，我又唔八卦嘅，不過大家都重有聯絡，但唔會講呢啲。」
再問到BoBo會否祝福Edison和Stephy時，她說：「吓？講到好似結婚咁嚴重，都祝福嘅，佢哋兩個咁襯。」
此外，前晚在派對上舉行的服裝表演十分大膽，示範牛仔衫褲的模特兒頻頻擺出三級甫士，包括男女互摸、男模揭女模裙底甚至男模與男模互摸等，開放程度比香港更甚，亦令現場氣氛十分沸騰，所有嘉賓都忘形跳舞，盡興一晚。
不過由於威勝片場鄰近民居，有居民因不滿派對的吵鬧聲而報公安，更一度有人擲磚洩憤，幸未有引發任何衝突。
記者JessicaNgan、RickyYip上海直擊
