很多男藝人最怕談論「召妓」這話題，但已婚的大宇卻敢於發表己見，他認為單身男人召妓不是錯，因他們跟已婚男人不同。那他會不會召妓？大宇說：「唔會，唔好囉！唔好搞咁多嘢啦，我係怕麻煩嘅人，為一剎那開心，你再諗後面嘅嘢，唔值得，同埋好唔有型，呢啲係感覺問題，坐埋有乜好傾？」但這回事不需傾，只需「做」？大宇即把五官堆成一團說：「好戇居啫，『你沖涼先定我沖涼先？』好冇型呀！」
不過大宇就承認愛看有吸引力的女性，他說：「其實對於女仔，任何一個老婆都會擔心，我已經身經百戰，唔會咁易埋到我身，已經過咗玩嘅階段，最重要係睇你本身。我會睇，冇罪㗎，做咪有罪囉。睇吓、諗吓都得啩？」
大宇揚言藝人應該小心言行舉止，他說：「鬼叫你出名咩？因為係藝人就要預咗，行街有人影你，係因為你紅，有啲二打六召妓都冇人知啦！咁我寧願選擇前者，小心啲囉。但有次好好笑，我好鍾意打桌球，聲雅廊（夜總會）幢大廈嘅十四樓係波樓，有次我打完波搭𨋢，架𨋢喺九樓停一停，跟住成堆小姐入晒嚟，我心諗死梗啦！俾記者見到實話我喺聲雅廊出嚟，影出嚟你話唔係都冇人信啦，好彩冇被記者影到！」
大宇和太太阿寶由拍拖至今已十多年，訪問當日（本月十二日）是他倆結婚四周年紀念，問大宇現在對阿寶的感覺，會不會已由熱戀變成責任？大宇想也不用想就說：「我愛我老婆㗎！唔愛都維持唔到咁多年。我哋相處好簡單、好舒服，最緊要佢開心就得啦。嘩！幾偉大呀，哈哈，但真係㗎！」
大宇續說：「好多人都問，你有乜婚姻之道呀？點維持呀？佢畀好多空間我；同樣地，我亦畀好多空間佢，大家唔係霸佔，最重要係信心。」
採訪：朱倬誼 攝影：陳慧安
服裝：西武 場地：CafeInn