無綫日前才宣布下月將破天荒推出限量版《金枝慾孽》ＤＶＤ，豈料近日已有翻版《金》劇ＤＶＤ在市面發售，原來不法商人將在網上流傳的《金》劇下載後錄製成ＤＶＤ，更以五十元平價發售，令無綫大感頭痛。昨日無綫強烈譴責此不法行為，更要求海關採取行動打擊翻版。
人氣劇集《金枝慾孽》全城熱爆，無綫遂決定於下月初破天荒推出三千套限量版《金》劇ＤＶＤ發售，不過，無綫這邊廂剛公布發售ＤＶＤ的消息，旺角一些專售不法翻版碟的店舖已有《金》ＤＶＤ發售，而且一套三十集只售五十元，較無綫每套ＤＶＤ售價五百八十八元平很多，認真無良。
香港的不法商人過往多是翻印ＤＶＤ和ＶＣＤ製成老翻販賣，不過隨着科技日新月異，不法商人已發展到將網上下載的電視劇集印製成ＤＶＤ發售。雖然這類翻版ＤＶＤ只能使用電腦播放，但畫面質素十分清晰，除粵語對白外還有中文字幕，加上價錢便宜，對無綫而言確實是一大打擊。
記者昨日在旺角星際城市店舖內除發現有《金》劇翻版ＤＶＤ外，還有多部無綫近年推出的劇集，如《棟篤神探》、《戇夫成龍》、《大唐雙龍傳》及《衝上雲霄》等，甚至稍後將在無綫播映的《功夫足球》亦有發售，售價以每張碟計算，一隻二十元、三隻五十元及七隻一百元。
事實上，無綫上月底才在內地推出正版的國語版本《金》劇ＶＣＤ，本周初才宣布推出廣東話版ＤＶＤ大計，雖然無綫推出的是限量版ＤＶＤ，但相信老翻的出現對無綫的ＤＶＤ銷路構成一定影響。
記者昨日致電無綫外事部助理總監曾醒明時，他說：「無綫一向正視知識版權，呢種侵犯版權嘅行為，唔單止對無綫構成嚴重影響，而且亦有損香港國際大都會嘅聲譽，我哋除咗強烈譴責呢啲不法行為外，更會要求海關正視呢個問題，我聽日會將呢個消息通知法律部門，等佢哋聯絡海關採取行動。」
對於《金》劇正版ＤＶＤ還未推出已有老翻發售，在劇中飾演如妃的鄧萃雯昨在電話中說：「唔係嘛？我呼籲鍾意《金枝慾孽》嘅人千祈唔好幫襯買翻版，大家不妨諗吓，如果本來八百蚊可以搵鄧萃雯做嘅工作，𠵱家八蚊就搵到人做，咁以後咪冇人搵鄧萃雯做嘢囉？大家套用喺自己立場去想，如果人人都貪平，咁香港咪好多人冇嘢做？好多電視電影製作人咪面臨失業？」
鄧萃雯又說：「我其實係一隻警犬，一向好抗拒啲人買翻版，每次我去親朋友屋企，都會睇吓佢哋有冇買翻版，俾我發現嘅話一定會話佢哋，話到佢哋唔好意思。我媽咪以前都有買翻版，但𠵱家已經完全唔買。我覺得無綫推出嘅《金枝慾孽》ＤＶＤ賣成五百幾蚊，對普羅大眾可能貴咗啲，我同一啲同事傾開，佢哋都話貴咗少少，所以我建議無綫不如推出一啲平裝版，價錢冇咁貴嘅，咁咪唔使啲人走去買翻版囉。」
採訪：戴彩煥、張俊銘
