立法會內務委員會噚日開會，通過前綫劉慧卿建議，成立兩個小組委員會，一個會討論議員酬金及申領工作開支原則，睇吓使唔使收緊條款，避免申領唔合理開支，同埋會睇埋議員應唔應該用公帑租番自己或所屬政黨嘅物業做辦事處，另一個委員會就會負責受理有關議員開支嘅投訴。
委員會日後將討論，除咗關於新一屆立法會投訴外，會唔會處理埋上屆嘅幾單「蘇州屎」，民建聯提到民主黨涂謹申被指漏報利益申報一事，民主黨李永達就建議，連埋陳婉嫻、蔡素玉及何鍾泰被指違規個案一齊徹查。
另外，民建聯繼續咬住長毛唔放，噚日喺內會提出要處理長毛於立法會內舉中指事件，內會主席劉健儀建議由議員個人利益監察委員會及議事規則委員會跟進。長毛同民建聯激辯，指自己只係重複黃宜弘嘅舉動，陳偉業批評民建聯想抹黑長毛，又反問如果舉中指要查，咁講大話、出賣港人利益更嚴重，使唔使查？
傳真︰2623-9278
電郵︰