陳智思、查史美倫得董特首委任為行政會議成員，凸顯陳查兩大家族嘅政治實力，陳智思由於年紀輕，未夠四十歲，只要小心保持健康，維護心臟，以後政治前途似錦，佢已經放棄美國護照，唔返泰國入籍，可說已埋下伏線，四年後如果佢參加直選成功，第五任特首（二○一七）競逐之時，佢先至得五十歲出頭，議會政治經驗極為豐富，又得北京祝福，兼且今日嘅有野心人士，到時已經垂垂老矣；尚未見露面嘅，經驗一定不及陳兄哥，即使如果到時特首要普選，陳兄哥仍然好有勝算。
呢日碰到一位保險界入行三十年嘅主席級人馬，問佢點解陳智思今年咁容易自動當選，冇人同佢爭？主席話：「理由簡單到極，一來陳智思係好人一個，夠隨和，冇架子，冇名門公子脾性，人緣極好；二來佢做立法會議員，簡值係津貼政府。每年政府畀佢嘅議員薪水連津貼百幾萬，根本唔夠佢請助理（四名）、辦事處、印議員通訊及聯絡選民之用，而且重有自己公司嘅職員同佢做義工呢？試問保險業呢行，邊度有人擁有咁優厚條件去全情投入政治呀？」
想落又係，其他人只有望陳智思自動放棄，走去參加直選，先至可以在保險界出線。至於查太，本身係美國大律師行出身，做過香港證監、中國證監，論經驗、地位，已高過晒現在證監會嘅任何人士，入咗行政會議，會係香港證監會嘅「太上皇」，詹培忠與查太正是棋逢敵手，將遇良才，董生行呢步棋，唔知有冇仙人指路呢？一九八八年，查家大新抱查伍少貞（查懋聲太太）參加香港總商會功能組別競選，輸咗，做唔成議員，後來重離咗婚㖭。十六年後，二新抱（查懋成太太）強勢入行政會議，查濟民老爺飲得杯咯。