一如所料，噚日兩隻重磅股「中電國際」同埋「和電國際」掛牌，果真引嚟勁多記者採訪，八方噚日所見，中電國際嘅副董事長兼首席執行官李小琳依然紅衫一度，唯一不同嘅係，佢條頸鏈同埋耳環比起上一次到港時更粗更大！
有行家問呢位前國務院總理李鵬大千金，次次見親佢都着紅色，係咪對紅色情有獨鍾？李大小姐話着紅色衫，主要係想攞個好兆頭，佢除咗紅色外，都好鍾意白色。八方諗落又係嘅，上市當然要着紅色啦，賣個滿堂紅嘛；結果佢隻股票果然高過招股價收市。
另一邊廂和電國際就唔係咁盞，首日掛牌「潛水」收場。八方事後諗，如果李超人親身出現掛牌儀式，唔係只派頭馬霍建寧嚟嘅話，結果會唔會唔同呢？
（圖）李小琳紅衫一襲，全日都滿場飛。
程志遠攝
傳真︰2623-9278
電郵︰