十大升幅窩輪，升幅14%至25%，十大跌幅窩輪，跌幅17%至50%。炒輪可以富貴，亦可令人閉翳。食得羊肉唔怕羶，食得鹹魚抵得渴。好多窩輪槓桿率十幾二十倍，正股只要上落三兩個價位，啲輪價就會上落10%，贏輸好快，心血少啲嘅，炒輪記得限制注碼。
平保C輪：平保（2318）3點55分成緊11.85元（前市11.95元），跟住4分鐘，一路殺上12.70元，鳴鐘時買賣價12.60/12.70元，電腦判收12.45元，升4.2%。唔係乾升，last4分鐘內有14.44球易手，佔全日總成交近6成，銀碼近億八。
平保C輪跟住正股彈上去，2233最後4分鐘由1.74元上到1.90元收市，升幅7.3%。若然正股升完之後冇跌，則隻輪重係偏低。隻輪明年2月到期，溢價負0.4%，槓桿率6.6倍（有效亦係，因已無溢價），引伸波幅不適用。
平保另1隻C輪2288，則更加靚，收20.3仙，升得2%，明年7月到期，溢價0.6%，槓桿率6.1倍（有效亦係），引伸波幅不適用。到底兩隻平保C輪是否重有得升，當然要睇埋下周正股點樣變化。
中鋁C輪：中鋁（2600）大散兩日之後，昨日彈上4.70元，有12.5仙進帳。C輪2167與4533分別上升10%與12%，都係收55仙。睇數據，兩隻輪都買唔落手。2167明年1月到期，溢價16%，槓桿率8.5倍（有效4.5倍），引伸波幅62.5%。4533明年6月到期，溢價28.7%，槓桿率8.5倍（有效3.9倍），引伸波幅56.3%。
章盛