賣地後樓價應聲彈升，二手住宅業主善價而沽，買家唔易執平貨，但都唔係完全冇機會，好似尖沙嘴港景峰，就畀個投資者用低市價五個巴仙入咗件貨。睇嚟二手樓業主又唔係全部都盲目樂觀。
件貨係二座D，七百六呎，以四百二萬交易，每呎五千五，利記姚偉基話，單位喺低層，坐向唔算好，其實放咗一段時間都冇承接，趁𠵱家賣地利好消息，平少少快手快腳賣咗，套現換樓，但仍然賺六十四萬。
買家係投資者，見月租可達萬八，計落回報有五厘，唔怕接。
最近以億四購入中環新華銀行大廈嘅買家，並非大熱協成行，而係隱形富豪莫慶堯醫生家族，莫醫生個仔就係名高音莫華倫。
莫醫生原來相當富有，家族揸住半山寶雲山莊，粗略估計值成三十億。代理話，呢幢拍得住富滙豪庭嘅豪宅，係由莫醫生家族自行重建，有百二個單位，九七年樓市高峯賣咗近二十伙，每個千八呎，當時做過萬八蚊一呎。若然樓價去番九七，每個單位市值三千萬。
今次莫醫生家族轉移陣地，買中區寫字樓收租，可能回報較高。
講開莫華倫，曾經喺貝沙灣亮過相，不過聞說最後冇幫襯盈大，而俾恒基嘅富滙豪庭吸引，買咗個高層，以便同家族成員住得更接近。
唔少基金趁豪宅市旺出貨，不過仍有部份積極喺市場尋寶。市場消息話，山頂PeakGardens其中一幢八個單位，由基金以億六掃入，每呎大約萬三，回報只有兩厘幾，勝在全維港景，有升值潛力。
據聞，呢幢柯士甸山道豪宅，業主由七二年一手揸到現在，一直收租。不過近年租金受壓，賣價卻節節上升，遇上買家大手洽購才割愛，成交相當低調。
PeakGardens樓齡較高，但間隔實用兼有靚景，單位大約千五呎，重新包裝再拆售，回報肯定好過新樓。
新界北「師奶幫」，原本諗住夾錢買三百萬樓收租，但係見賣地成績好，索性將筆錢做晒首期，買多幾間投資，希望賺多啲，最後掃咗七間粉嶺牽晴間，總值成千萬。
利記余艷霞話，佢哋專買啲比市價平五至十巴仙嘅單位。
講開大手，美記郭玉滿話，一名豪宅投資者，一擲三千幾萬，買咗將軍澳蔚藍灣畔五伙。其中第三座高層A，逾千六呎，作價近千二萬，每呎七千，創近年將軍澳區新高。
聽聞，買家之前買入同區維景灣畔相連戶，重有大角嘴維港灣複式，同畢架山一號。
蜆殼石油標售灣仔軒尼詩道二五六號油站連樓上全幢，噚日截標，共收九支標，好明顯又係發展商「麵粉荒」作怪，估計十拿九穩賣得出。
日前兩幅九龍地王拍賣，出價甚勇嘅信和，今次亦有入標，實行繼續大小通吃嘅策略。
呢個油站大約四千八呎，可重建三萬幾呎純住宅或者七萬幾呎商業，優勝之處，係軒尼詩道一帶店舖非常值錢，起住宅亦唔憂賣，發展商當然興趣大，市場人士估計，值億五以上。
蘭西
電郵地址：
