一如市場預料，噚日兩隻掛牌新股一隻掂一隻唔多掂，受觀迎的中國電力（2380）較招股價高16.6％，收2.95元。至於和記電訊（2332）雖然有保薦人力頂，但都係破底收場，較招股價低2.7％，收5.85元。
另外，經紀黃又話，可以重新留意北泰創業（2339），隻股有好一段時間成交非常淡靜，但近排已經活躍番，據聞除咗因為公司努力與證券界聯絡，搞好投資關係外，重同個別投資銀行行得好埋，睇嚟有動作跟尾。
雖然北泰會有乜嘢新搞作暫時未清楚，但早排公司同日本公司簽訂合作協議，北泰的汽車零部件，開始進入日本市場，呢單嘢據講頗為令投資者受落，皆因北泰產品一向主要輸往美國市場，呢個合作計劃具策略性意義。據講北泰管理層甚至曾向證券界表示，唔排除會引入埋日本仔做策略性股東。
不過北泰噚日股價表現就麻麻，下跌3.4％，收2.125元，成交股數110.8萬股，金額234.6萬元。
慕容小初