過去兩日八方個電話幾乎冇停過，其中九成都係問一樣嘢──TVB新聞部搞乜？睇嚟應該自動飛線畀陳志雲至啱。
新聞部人事變動，久不久就一次，不過TVB係大台，牽涉嘅人又夠晒江湖地位，特別矚目而已。咁究竟發生乜事呢？咪就係一套《金枝慾孽》嘅現實版。至於邊個係乜角色，各方友好人言人殊，但大家都共同地有啲感慨。
綜合各路消息，個古仔大概係有前朝重臣，不滿現時掌權派鏟除其親信，於是向皇太后告狀，有啲朝中人馬配合做金手指，於是在財政要緊縮嘅大氣候下，策動一齣宮廷政變，掌權派三人最後下馬，但重臣是否復出，現時仍然未知，陸續有人起身，幾乎可以肯定。各位如有堅料，歡迎提供。
咁點解有財政壓力要裁員交人導致衝突呢？第一係皇太后節儉成性，第二係二十四小時新聞台嘅銀河一直唔掂。點解唔掂？又好似整定咁。照計無綫有優秀節目，電盈有強大網絡，一拍即合啦，但傾極傾唔成，結果銀河得幾百個客，電盈就要同亞視合作。據說，最大關鍵係美國佬，事關呢個美國拍檔，本身搞衞星傳送，如果無綫用咗電盈個網，佢哋做乜呢？所以根本就唔想同電盈傾。到美國佬退出唔玩，電盈又剛剛同亞視傾掂，轉唔到彎。聽講銀河因人手問題，準備在夜晚重播番之前嘅新聞算數，但咁又點算二十四小時呢？
傳真︰2623-9278
電郵︰