現年十六歲的英皇美少女梁洛施（Isabella），入行後即三度與台灣靚仔陳柏霖結片緣，二人更傳出緋聞，雖然Isabella少女情懷總是詩，但她揚言不愛靚仔，獨愛細眼扁鼻兼大口的男孩。
梁洛施入行日子甚淺，但這位情竇初開的美少女在短短半年內，便與台灣新晉靚仔陳柏霖合拍電影《見鬼拾》、《蟲不知》及現時在湖北拍攝的《情天大聖》，難怪二人的緋聞甚囂塵上。
目前又與陳柏霖同在湖北拍片的Isabella，日前接受本報記者電話訪問時笑言，自己不喜歡靚仔，所以與陳柏霖一定沒有發展機會，她說：「我同佢兄弟嚟咋，我睇落斯斯文文，其實我好粗魯，性格都好男仔頭，同柏霖仔係傾得埋，佢個人好活潑，我哋成日都玩㗎啦！」
Isabella續說：「我都唔鍾意靚仔，唔鍾意傳統嘅大眼、鼻高高、嘴細細，全部掉番轉就啱啦（即細眼、扁鼻、大嘴），所以同柏霖仔冇可能！」傳出緋聞後，兩人繼續合作，問她可會感到尷尬？她笑說：「唔會呀，都冇嘢，點會尷尬呀！」
Isabella強調英皇及母親從來沒有不准她拍拖，她卻希望在十八歲後才考慮感情事，她說：「公司同媽咪一路冇話唔可以拍拖，我自己就想大個啲至諗呢啲嘢，一來係想自己成熟啲，識諗啲至講，同埋有機會做嘢係好難得嘅，𠵱家梗係以工作為上啦！」
不過，Isabella表示其母親非如別人所講般，經常陪在她身邊是想管住她，Isabella說：「我唔鍾意啲人咁講，媽咪唔係昅住我，佢係照顧我，又驚我做嘢唔記得食嘢，又驚我病，佢係關心仔女咋！」
採訪：朱倬誼
攝影：何國豪
髮型：Daniel（ChinG）
化妝：Yvonne（Beautytech）
服裝：FrenchCollection、Fioracci
場地：帝苑酒店
