比賽場館有五十幾個包廂，每個價錢成十五萬人民幣；原來姚明都包咗兩個，不過佢否認係為自己女友葉莉同佢嘅父母訂嘅，只係話幫朋友訂云云。小記都好想睇清楚姚明訂嘅包廂到底坐啲乜嘢人，可惜佢打死都唔肯講包廂嘅正確位置。
小記提早去到上海體育館外，雖然比賽重有一段時間先至開始，但黃牛黨已經非常活躍，𠵱家佢哋手上啲飛嘅價錢已經暴漲咗五倍，好似一張一百蚊人民幣門票就炒到五百，二百就炒到九百，最貴嘅一千九百八十蚊門票就賣成三千蚊。佢哋重有個口號㖭：「甚麼票都有，連一萬多元的票都有！」
劉煒俾隊友整蠱！喺帝王球員準備出場時，成班大叫：「Herewego！」排喺頭位嘅劉煒以為係列隊出場嘅時候，立即一馬當先衝出球場，點知走咗出球場幾步後，先至發覺俾人玩，只好尷尷尬尬咁走返轉頭，捉住笑得最大聲嘅碧比嚟發洩。