林憶蓮噚日出席喺太古坊舉行嘅《太古120週年誌慶酒會》，今次邀請憶蓮出席活動嘅係佢嘅中學同學，亦即係太古糖業董事總經理霍宇山，不過憶蓮就透過公關公司表示唔接受訪問，而且只係逗留咗十幾分鐘就走人。
其實憶蓮自從同李宗盛婚變之後，就好似患上香港傳媒驚恐症咁，噚日嘅活動喺下晝四點半開始，大會就邀請憶蓮四點五十分到，憶蓮一嚟就喺台上講番佢早前出咗嗰本書《林憶蓮——上海回味》，佢話自己最鍾意食酒釀湯圓同熏魚，話呢啲菜式都係要用大量糖嚟做嘅，講完一大輪之後，佢就替嗰兩件由糖塑造出嚟嘅抽象派塑像揭幕同祝酒。
憶蓮除咗唔做訪問，大會安排供傳媒拍攝嘅位置足足離台十幾呎，確保冇人埋到憶蓮身，馮仁昭都好想話畀憶蓮知，𠵱家香港嘅離婚率都好高，好多單親媽咪都係好似佢咁又要工作又要照顧自己嘅小朋友，憶蓮又何必要避來避去呢！
去過北極旅行嘅黃智賢，噚日同李樂詩博士出席RoadShow嘅記者會，黃智賢講番之前嘅極地之旅，得到好多人生啟示，佢話：「以前做嘢會覺得愈忙愈好，因為可以賺多啲錢，但見到嗰度嘅人點樣面對困難，令我嘅價值觀完全改變晒。」
鄭希怡（Yumiko）同Boy'Z噚日到電台接受訪問，順便幫主持車淑梅慶祝生日，佢哋重送咗套紫色透視睡衣畀車淑梅。車淑梅又收到個仔嘅長途電話祝賀，結果忍唔住當場落淚。Yumiko話住喺上海嘅父母將會欣賞佢即將舉行嘅音樂會，佢話：「我怕我到時忍唔住喊。」
秦沛同蘇志威等前晚搞咗個香港藝人高爾夫球會成立答謝晚會，蘇志威係副會長，佢話自己打得唔叻，但佢成功踢咗許志安同蔡一智入會，至於有雜誌影到蔡一傑嘅爛面相，蘇志威話：「佢一路都有敏感，十幾年前已經係咁，𠵱家啲人寫，唔知乜嘢居心。」
歐陽震華噚日去商台接受訪問時，好抵死係咁踩佢老友宣萱，佢除咗話宣萱近排珠圓玉潤之外，重猛咁笑對方前日着咗件入膊衫顯得個人好大隻，直頭好似一個舉重選手一樣，佢重話宣萱個嘴同阮兆祥個漢堡包嘴一樣有得揮，而且覺得佢哋兩個應該係龍鳳胎咁話。
下個星期四上映嘅《驅魔人前傳》，印有兩款海報，其中一款係以主角嘅綠眼為背景，另一款就係一個倒吊嘅女人頭，地鐵公司擔心呢兩款海報會嚇親較為細膽嘅乘客，所以決定唔接受影片公司申請，禁止海報喺地鐵範圍張貼。
