C小姐患感冒去睇醫生，正常診金四百五，雖然有啲肉痛，但一早預咗，唔會嘈。醫生睇咗佢三分鐘，就低頭寫配藥，C小姐突然醒起，佢曾經驗血，某類症狀究竟需唔需要食藥抑制呢？於是問醫生：「咁咁咁使唔使食藥呀？」醫生答咗一句：「唔使！」跟住話要收多四百五蚊，因為佢已經為C小姐做咗一個醫學判斷，與你嘅感冒無關，故此要另外收費。
C小姐為之氣結，畀錢之時，真係痛到入心，連感冒都冇埋。食飯之時，佢講起呢件事，猶有餘痛。飯局主人T先生話：「可能醫生位太太買多咗一件Chanel，要你哋啲病人夾番畀佢！」T先生曾經移民澳洲，住過雪梨、墨爾本，對當地生活甚為熟悉，T先生話雪梨有一間牛扒屋收費屬海鮮價，日日唔同，但因為每份牛扒份量夠大，一份足夠兩位香港女士食，冇客人投訴呢間牛扒屋啲收費冇準則，加上牛扒屋嘅牛肉來自老闆嘅私人農場，肉質嫩滑，所以牛扒屋門口經常有一條人龍，等候入內。
T先生有一位熟朋友（澳洲本地人），一定訂到位，T先生去咗幾次，覺得價錢經常不同，如果請客，冇乜預算噃，於是問熟朋友：「究竟老闆點樣訂價㗎？」熟朋友唔知講笑定講真：「其實係睇心情，老婆同佢鬧交，第二日佢就收多啲，老婆用多咗錢，佢又收多啲，佢開心高興之日，就會收順啲。」如此餐廳，甚為罕見，T先生話如果我哋去雪梨，佢一定會介紹喎。
C小姐嘅醫生或者係喺澳洲偷橋，有得斬便斬。左丁山一家人睇一個醫生，睇足二十二年，已經成為朋友，睇病之時問多多問題，佢都唔會收多一個仙。久唔久就換醫生，其實唔見到有乜益處。