黃家強早前一擲七十萬於大角嘴開設新band房，房內擺放着已故胞兄黃家駒的結他作為紀念，家強揚言開設band房只為做好音樂，難怪他對於「扯線偶像歌手」嗤之而鼻，又將咪嘴歌手封為「神棍」，相反家強對一眾新興樂隊就拭目以待。
樂隊Beyond三子近期三分天下，黃家強獨資七十萬於大角嘴開設全新band房，而黃貫中的新band房則設於土瓜灣，至於舊有位於花墟的「二樓後座」就留給葉世榮打理。
家強的新band房面積達一千一百六十呎，內裏設置錄音室，他下月推出的新唱片就於這band房內製作而成。家強物色好單位後，親自負責設計工作，並裝上隔音玻璃及在牆上鋪隔音棉，而玄關則放上一幅由鼓手朋友繪製的仿畢加索抽象畫作為布置。除此之外，房內更有家駒的人頭銅像，而家駒的一支黑色結他，亦放在房中留念。
家強說：「因為大家成日都分開做嘢，舊band房唔夠用，我揀大角嘴除咗租平之外，重因為近『二樓後座』，返去或者攞架生都方便啲。」
家強現時與其他樂手另組PicassoHorses（畢加索的馬），他說：「其實我係想做一個label出嚟，呢個label可以做音樂、唱片，唔係樂隊名嚟㗎。」提到新興樂隊PingPung及MyLittleAirport，家強說：「不嬲都期待有新一代出現㗎啦，喺唔同階段都有啲新人，無奈有好多好易放棄，樂隊可以發掘到樂迷更多唔同嘅興趣。偶像歌手先係嗰啲最冇內涵嘅歌手，偶像歌手唱得好都係冇內涵，音樂唔係自己，詞又唔係自己寫，個靈魂係啲幕後，歌手得個空殼、係扯線木偶。」
對於時下歌手咪嘴，家強說：「預咗咪嘴就一定㗎啦，佢哋有時間都接多兩部戲，都唔關音樂事嘅，無謂討論呢啲人，簡直侮辱音樂，以前有邊個歌手唔唱live㗎？𠵱家就愈嚟愈多，可以呃人喎，呢個世界咪愈嚟愈多神棍同騙子囉。」
採訪：朱倬誼
攝影：羅德光
