雖然球星如雲，但皇家馬德里季初表現依然不濟，惟有再班兵將實力進一步加強，反正有錢嘛。呢排就傳會收購阿根廷球會河床嘅中場馬斯查蘭奴，佢喺皇馬嘅同胞蘇拉利，就未見因為又多個人爭位而唔開心，反而大表歡迎！
蘇拉利呢幾年喺皇馬嘅身份可謂球星「替身」，出場機會冇乜，點解重可以咁大方？原來馬斯查蘭奴十三歲時進入當地足球學校，之後再轉會河床，合約上訂明以後馬斯查蘭奴再轉會，間足球學校可以獲得三成轉會費；咁啱間足球學校嘅老細，就係蘇拉利老竇同佢啲世叔伯，所以呢次轉會成事，蘇拉利屋企人亦可以賺一筆，難怪佢重可以咁大方啦。
中國前晚輸畀科特威，雖同科隊同分但得失球少兩球，隨時係世盃外圍賽出局；要下場對香港贏大大鑊，就可出線次階段外圍賽，故中國嘅《東方體育日報》叫香港鬆章畀中國。雖然中港一家親，不過國際足協提倡公平競技，中國因黑哨問題形象好差，我求大俠絕對唔讚成咁做。
大部份隊長都冇實際權力，但韋拉就唔同，冇阿仙奴球員可以唔聽佢話。佢話阿仙奴領隊雲格畀佢喺隊度話晒事，所以佢每句話都好有影響性；如果隊友想着短袖衫比賽，若然佢覺得凍想着長袖衫，其他人都要聽佢。好彩韋拉喺冬天都會着長袖衫比賽，唔係阿仙奴班球員就慘囉！
巴塞隆拿睇中河床嘅十二歲神童拿美拉，希望可帶佢到西班牙受訓，但拿美拉家人話俾巴塞玩死。因為拿美拉𠵱家咁紅，而阿根廷治安差，不時有名人俾人綁架，拿美拉家人亦擔心佢哋一家成綁匪目標。如拿美拉飛唔甩阿根廷，佢哋一家都唔使旨意安心瞓得着。
荷蘭兼阿積士新星尹達華特前晚場波冇入波，但仍成為焦點。事關佢除咗俾隊友迪莊解圍時省中後腦而搞到一度不省人事，重俾人影到當眾除條單車褲；當大家以為有嘢睇時，原來佢褲中有褲，總共着三條褲。佢俾人省到暈得一陣陣，唔知周六對海倫芬場荷甲踢唔踢到？