劉德華前晚與鄭秀文（Sammi）乘坐價值五千萬遊艇為《龍鳳鬥》首映禮造勢，華仔早前因過瘦做身體檢查，結果發現眼內有肉瘤，稍後要入院割除，而且膽固醇過高。
劉德華與鄭秀文前晚在銅鑼灣出席新戲《龍鳳鬥》首映禮，他們先乘搭林建岳的價值五千萬港元遊艇，遊船河到中環皇后碼頭，其後華仔與Sammi在保安護駕下登上勞斯萊斯房車，到銅鑼灣出席首映儀式，其間場面一度混亂，華仔整晚不時拖着Sammi，很有風度。
華仔早前因過瘦而作全身檢查，他前晚表示檢查結果指他健康良好，但就有些小問題，華仔說：「因為我鍾意飲水同成日出汗，所以尿嘅濃度過淡，但呢個醫生話唔緊要，不過我膽固醇高，同埋眼裏面生咗粒肉瘤，好似係脂肪粒，要去醫院割咗去。」但華仔謂要待完成巡迴演唱會後才會到醫院切除肉瘤。
穿着一身低V衫亮相的Sammi表示最難忘與華仔床上激吻，華仔則讚Sammi有如親人，華仔說：「佢好似收埋屋企嘅另一半咁，我最難忘同佢喺梳化上kiss，好激烈，大家都有鼻水，互相交流，非常有味道。」Sammi其後謂華仔的說話讓她十分感動，但不怕傳緋聞，她說：「唔會，可能我冇吸引力呀。」
前晚捧場嘉賓也不少，包括鍾鎮濤與女友范姜及B女鍾嘉湄、林建岳母親余寶珠、谷德昭、湯盈盈等，阿B接受訪問說：「我哋全都係華仔同Sammi嘅fans。」問他可會欣賞章小蕙新戲《桃色》，阿B便說：「唔關我事嘅我唔講。」
採訪：何永寧
攝影：陳偉權、何國豪
