珍妮花洛庇絲（JenniferLopez）嘅新片《談情共舞》今日喺全美公映，籮霸為博人氣反彈，近日四出為新片宣傳同接受訪問，佢早前接受雜誌《UsWeekly》訪問，就坦言自己想快啲做媽咪，同MarcAnthony結婚四個月嘅佢話：「𠵱家冇嘢比家庭對我更重要，我一直都想有自己嘅家庭，我覺得呢個係我最重要嘅計劃。」籮霸又表示佢想令佢哋嘅婚姻生活保持低調，咁先可以令婚姻長久。而電視頻道E！為咗向拒絕接受訪問嘅籮霸反擊，決定製作一個揭露佢私生活嘅節目。
另外，有消息指籮霸好妒忌前男友班亞弗力（BenAffleck）並冇因為同佢分開而變得憔悴，反而咁快又搵到珍妮花嘉娜（JenniferGarner）呢個樣又靚人又紅嘅女友，所以佢對班仔兩人嘅感情睇得好唔順眼。
而班仔近日喺加拿大溫哥華出現嘅時候，俾人見到佢隻眼同個嘴都瘀晒，原來因為拍新片《ManAboutMan》要俾人打，所以要化妝化成咁，班仔嘅影迷大可以放心。