兩幅地皮，周二以打爛全城眼鏡嘅超高價賣出，二手住宅業主封盤反價之聲不絕，買家急於入市，甚至肯主動加價，以打動業主。
港置吳宇奇話，與何文田地王同處一區嘅君頤峰，八座中層A，千七呎，有個外區客睇樓後好鍾意，出價逾千一萬洽購，略低於業主叫價，個客見業主冇乜反應，好醒目，即刻主動加價八十萬，終於以一千二百三十萬，成功購得單位。
另外，香港置業助理區域經理夏笑笑話，薄扶林貝沙灣二期六座高層A，千七呎，業主原本以千四萬放售，賣地後即時反價八十萬，但都有買家肯追價承接。
近排忙於籌備發售荃灣爵悅庭嘅新地，將其中一個宣傳重點，擺喺代理身上，噚日約齊四大代理行，搞個大型誓師會，超個四百個經紀，V字形排列，夠晒氣勢。
除咗佣金，新地重有獎品以示鼓勵，就係價值六十萬嘅寶馬房車一部。新地嚟緊兩星期，舉辦銷售比賽，中原、美聯、利嘉閣同港置，邊間賣得最多，就可以揸走架車。
新地代理總經理周國賢話，該盤未有售樓紙，因此未開始得比賽。由於獎品豐富，難怪價錢都未有，代理已經自組買家，合共圈咗三十幾層。
深圳一手樓銷售手法追得上香港，近年不時都見有熱賣場面，深圳大綜藝實業福田「星座傳奇」，八月底搞電腦化網上認購，一個禮拜收到逾千個登記。
上月二十五日揀樓，推出四百九十套，一日賣出三百五十套，呎價六百三十蚊人民幣，首期兩萬有交易。
代理置業國際話，自住同投資者各佔一半。該盤月底公開發售，有意加價五巴仙至一成。
該盤共七百七十五伙，三百四十至六百九十呎，明年中入伙。
上個月樓市再展升浪，造價唔夠貼市嘅銀主盤，成為追捧對象，全月共賣出四百七十二個，比八月多十四個，係今年按月新高。
最多銀主貨成交嘅屋苑，係天水圍嘉湖山莊，共有十宗，比八月多四宗；港島龍頭屋苑鰂魚涌太古城，有五宗，打破過去三個月「食蛋」嘅困局。
利嘉閣董事總經理何紹章話，賣地成績理想，二手住宅業主大幅反價，銀主盤加幅相對較細，質素差啲嘅，重唔加價㖭，預期銀主盤會更受歡迎，成交會增加，甚至可以跑贏大市。
何文田地王天價成交，即時帶挈附近業主，就如澳門公司持有嘅紅磡得利閣五個單位，即時委託代理一籃子出貨，叫價八百六十萬，以每個六百七十呎計，平均每呎二千五，平過天光道地王「麵粉價」接近一半。
代理置華物業董事李健民話，賣地後，何文田區業主普遍即時反價一至三成，持有得利閣嘅公司，就借勢一批過出貨。
位於高山道嘅得利閣，樓齡約十年，高二十五層，有四十八個單位，兩至三房，今次出售嘅五個單位屬低、中層，部份連租約。
賣地成績好，發展商都想趁勢推盤，最心急等售樓紙嘅，相信係華置與新地，因為佢哋嘅荃灣樂悠居及爵悅庭，籌備做足，只差臨門一腳。
華置柯靄邦話，佢哋好想今個月底可以開盤，下周畀傳媒參觀示範單位。至於價錢，雖然何文田塊地高價賣出，但佢哋賣樓只會以市價做參考，如果新地爵悅庭賣先，樂悠居會睇住爵悅庭嚟定價。
駿豪集團深圳豪宅盤，觀瀾湖高爾夫大宅，幢幢售價過千萬，為咗凸顯有齊大宅、名車同高爾夫球場嘅頂級生活，發展商噚日喺淺水灣道六十號邁巴赫中心，舉行「觀瀾湖頂級生活鑑賞」酒會，請咗唔少城中名人，例如演藝界任達華，財經界鄧聲興等出席。現場提供紅酒、雪茄同佳餚，夠晒氣派。今個月二十八號（禮拜日除外）前，喺邁巴赫中心舉行展示會。
講番個盤，已經賣咗二十幢，套逾三億，每幢四千七至九千三呎，遲啲會推出達萬六呎嘅超級大宅㖭。
恒隆長沙灣碧海藍天，合作夥伴韓國現代建設，兩位高層噚日去到現樓參觀。
現代建設常務董事崔瀚柱話，公司近七年喺香港參與三十個承建項目，有樓盤、基建，工程總值二十億美金。恒隆大角嘴浪澄灣就係其一，而碧海藍天就做埋發展商。佢話，一向欣賞香港樓盤嘅會所，設計同休憩用地等，好值得學習。佢透露，之前有韓國同事嚟過香港參觀。
蘭西
電郵地址：
