恒指跌1%，國企指數重慘，跌夠2.4%。短期形勢混亂，有可能下試上月低位12884（昨收13035，最低12982），重有百幾點下跌空間。
中企指數P輪：國企唔掂，中企指數P輪9955最巴閉，由3仙彈上4.6仙，升幅53%，做咗是日輪王。隻輪溢價1.7%，槓桿率34.1倍（有效19.7倍），引伸波幅28.6%，未來幾日，國指無法唔波動，隻輪一定飛沙走石，炒9955要留意下周四最後買賣，剩番5日交投，時間因素對隻輪不利。
若然繼續睇淡國企，中企P輪2166比較實際，明年1月尾到期，輪價15仙，溢價5.0%，槓桿率7.8倍（有效4.7倍），引伸波幅37.4%。中企P輪4549，收20.2仙，升得3.6%，主要因為啲數據冇咁靚，隻輪明年4月尾夠鐘，溢價10.1%，槓桿率6.8倍（有效3.6倍），引伸波幅39.7%。
中企指數C輪：國指過去3日由4795跌到4543，跌252點，跌幅5.3%，可能有炒友認為跌夠，或者再跌多少可以博反彈。認為國指遲吓有機會回升，搵定啲對象，可以揀2139或者4545。2139年底到期，輪價15.2仙，溢價3.7%，槓桿率11.1倍（有效7.4倍），引伸波幅34%。4545明年4月到期，輪價16.2仙，溢價10.8%，槓桿率8.5倍（有效4.7倍），引伸波幅41.2%。
和黃C輪：和黃（013）跌1元，今日和電（2332）上市，對和黃可能有指示作用。李超人亦可能增持和黃。留意和黃C輪2157，有機會博反彈，記住有得執就要落車。
章盛