啱啱搶咗簡尼嗰德國正選龍門位嘅列文，或打回原形做番後備，甚至連入選嘅機會都冇埋。點解？之係佢唔醒目囉，冇戴德國官方贊助商嘅手套落場比賽囉！
「三間」每年贊助德國足總成五百五十萬鎊（成七千七百萬港元），所以德足總規定，唔理國腳係邊間贊助，總之喺國家隊一定要用「三間」嘅產品比賽。唔知列文有心定冇意，喺上周六贏伊朗二比○場友賽，竟戴「一剔」嘅手套。
事後列文俾德足總書面警告，重要脅佢如日後幫阿仙奴比賽唔棄用「一剔」，休想入選國家隊。
呢單嘢係列文唔啱，但佢擺明俾人擺上枱。事關德國教練奇連士文不嬲都想飛起簡尼捧列文，早前炒埋好撐簡尼嘅龍門訓練員美亞，令德足總支持簡尼嘅人非常不滿；𠵱家列文衰咗，佢哋重唔將件事有咁大煲咁大咩！
話時話，如列文真係俾德足總飛起，有個人肯定總開心過簡尼，佢就係最唔想啲球員幫國家隊比賽嘅阿仙奴領隊雲格囉。
皇家馬德里同巴塞隆拿令巴西卡路士、朗拿度同朗拿甸奴喺踢完周三嘅世盃南美洲區外圍賽，可以喺周四黃昏返到西班牙備戰周六嘅聯賽，就夾咗十二萬歐元租架噴射機去接佢哋。貴係貴咗啲，但佢哋對皇馬同巴塞實在太重要，如果周六落唔到場，想贏波都幾難，呢啲錢真係唔慳得。
之前狂插車路士領隊摩連奴嘅梅度，幫羅馬尼亞踢完比賽，原本喺星期一返車仔練波，但玩失蹤；聽聞車仔高層威脅同佢解約㖭。但車仔唔會咁做，事關杜奧巴養緊傷，如放走梅度，就得番古莊臣同基斯文，唔怪得梅度夠膽玩嘢啦！梅度咁冇職業操守，睇怕冇大球會肯簽佢。
祖雲達斯前鋒伊巴謙莫域上場對烏甸尼斯時，被鏡頭影到佢用頭頂對方球員施巴利，諗住被罰停賽啦，點知紀律小組開會後判佢無事。原來，只有當球證報告無提嘅事，紀律小組至可睇番片秋後算帳，而當日球證有mark低但無即時罰「伊巴」，所以小組唔能夠睇片罰佢。
巴西隊隊長卡富日前透露希望喺退休前，可以喺巴塞隆拿踢番一季半季至收山。我求大俠即刻諗起巴塞另一位同位置嘅巴西球員比列堤，當年比列堤一度以卡富接班人姿態出現，不過卡富愈踢愈有，比列堤一直冇上位機會。𠵱家卡富重想走去同佢爭位踢，真係戥比列堤慘囉。