今個星期，無論喺蒲東抑或蒲西，全上海嘅酒店都幾乎爆滿，想搵間房重難過登天。皆因NBA官方早就預訂咗三間酒店，大約共四百八十間房間。無獨有偶，據聞手提電話品牌Nokia又咁啱喺上海舉行周年大會，結果累到我哋班行家幾乎搞到要瞓街。
為咗應付班「高」人一等嘅NBA球員入住，上海嘅RitzCarlton酒店特別為佢哋「加大」張床。以姚明為例，佢張大床寬兩米、長兩米半，至少可夠三至四個普通size嘅人瞓。另外，教練房間重加設咗一部DVD機，方便佢哋研究比賽錄影帶，認真照顧周到。
剛加盟帝王集訓營冇耐嘅劉煒，原來噚日都想學姚明咁，希望作東請班隊友食餐地道嘅上海美食，點知佢可能同啲隊友唔喺咁熟絡，加上只喺隊中嘅一名新丁，結果食咗檸檬。無辦法喇，鬼叫你做細咩！