拍地後，市場普遍認為樓市一片光明，業主紛紛封盤加價，估唔到竟然有業主加佣出貨，最高畀到兩個半佣，個單位係熱炒嘅西灣河嘉亨灣。
呢個一座中層C單位，六百三十九呎，購入價約四百萬，香港置業區域經理葉明輝話，若做到業主指定個價，最高可以收到兩個半佣。拍地前樓盤嘅二手放售，最高都係得兩隻佣。另外，業主又會送價值三千蚊嘅手提電話畀促成買賣嘅代理。
佢補充，業主係見樓市向好，所以勢趁沽貨，諗住換馬買個千呎單位投資，重話會幫趁番同一個代理㖭。
地產商高價搶地，為庫房進帳過百億，唔少地產商擔心，樓市大旺，同政府磋商補地價時更加困難，要用高價補充土地，加重發展成本。
萬泰集團總經理周國材噚日就話，集團喺九龍灣宏泰道嘅一幅七十萬方呎工貿地皮，向政府申請轉做寫字樓，就補地價問題已經傾咗幾次，但日前兩幅市區地皮高價賣出，如果政府堅持高補地價金額，會暫緩磋商步伐
地產前景好，萬泰將擴大地產業務比重，會再研究勾地。同時又會進軍內地市場，現時喺上海、蘇州同杭州物色住宅地皮。
和黃地產中國市務部總經理譚健旭話，旗下珠海海怡灣畔，最近受惠於CEPA同落實興建港珠澳大橋，喺香港辦嘅二十個睇樓團，全部爆滿，呢個消息公布後，物業銷量增加兩倍幾。
今個禮拜六推出十八個三A期單位，定價每呎約三百七十蚊。佢話三A期之前賣咗嘅單位，呎價都要成四百七十蚊，今次專登優惠港客，先有咁平喎。
另外，和黃亦請嚟世邦魏理仕亞洲區執行董事聶安達，講吓珠海呢幾年嚟無論喺經濟、住宅樓面租售量及租售價上，都有顯著增長，加上泛珠三角概念、CEPA及大橋興建，珠海會成為經濟及交通樞紐，前景亮麗。
代理行業有時兵不厭詐，就如最大華資行之一中原地產，早前老闆施永青以一億五千萬，售出尖沙嘴太平洋大廈地下至一樓麥當勞租用嘅舖位，代理公布買家係澳洲基金，不過蘭西翻查註冊處紀錄，發現買家原來係最近相當活躍嘅店舖投資者羅太黃靜敏，亦即係早前同兆安地產李太喺銅鑼灣換貨嗰位。
剛巧中原噚日又公布，話旺角朗豪坊對面嘅舊文華戲院，成交價三億四千八百萬，買家係新加坡財團。不過，據悉買家係投資者馮國保及有關人士。
可能因為代理行業競爭太大，唔想對手太快洞悉交易真相，又或買家想保持神秘，故弄玄虛，結果市場就慘被誤導。
樓市升勢停不了，多咗業主換樓，唔少「先買後賣」，所以香港置業同經絡集團，聯手推出「換樓易」按揭計劃，過渡期貸款息率係優惠利率減兩厘半。
貸款額可以高至舊樓市值七成（扣晒未還欠款計），或者係新樓市值三成，以較低者為準。貸款期六個月，期內只係畀利息，到期日就還本金。
蘭西
電郵地址：
