精明消費：<br>買定裝備迎萬聖節好玩造型似模似樣精明消費：
買定裝備迎萬聖節好玩造型似模似樣
雖然距離萬聖節重有兩個多星期，但吸取往年經驗，想有得揀又可以買到新貨色，呢個時候就要出動搜括喇！同往年一樣，市面各大小店舖已推出不同款式的面具、造型裝束和道具，新舊款齊備，搞笑、搞鬼裝扮任你揀！
記者：黃婉冰
攝影：楊錦文、黃子偉
ImageGirl&Boy：Nokia、Joanna（StarAsia）
鬼馬造型由頭扮到落腳
要成為全場的焦點所在，造型絕對唔可以馬虎！重未諗到扮何方神聖？不如先睇睇下面幾款造型鬼馬嘅扮嘢服飾推介，有經典人物好似吸血殭屍同巫婆，亦有細路仔至愛嘅卡通人物，你又諗到扮乜嘢未？
修士袍襯銀片披肩
黑色修士袍加奪命狂呼面具，效果夠晒鬼魅，呢個造型絕對最煞食，男仔不妨諗諗！女仔想有個搶眼造型，可以諗諗呢件釘滿閃片嘅斗篷，尤其是去派對就最啱，着起鬼咁Sharp，做隻靚鬼都唔錯！
售價：修士袍及面具$110（a）
閃閃披肩$79（a）
可愛蝙蝠仔
小朋友要扮英雄人物，蝙蝠俠必定榜上有名。呢件蝙蝠仔衫，一出已大受歡迎，小朋友着上身，張開雙手就好似一隻張開翼嘅蝙蝠一樣，全件以絹布做成，小朋友着得舒服。
售價：$69（不連面具）（a）
圓咕碌南瓜仔
南瓜係萬聖節另一熱門扮相，連帶呢件南瓜衫亦成搶手貨，最啱小朋友買返學校開Party。圓咕碌南瓜衫造型夠盞鬼，外形肥嘟嘟，人見人愛。
售價：$59（a）
醒目仔巴斯光年
講到小男孩最愛嘅卡通人物，又點可以無巴斯光年？全套以夾棉質料做成，衫身質料較挺，着上身外形同卡通入面個巴斯光年一模一樣，共有三個尺碼選擇。
售價：$570（c）
吸血伯爵型爆鏡
扮隻好似湯告魯斯喺電影《驚情四百年》內咁型嘅吸血伯爵，呢套型仔吸血殭屍衫就啱晒。斗篷、恤衫、大衫領、掛頸飾物樣樣齊，再由自己加棚殭屍牙就由頭型到腳。
售價：$350（c）
女巫婆最生鬼
想做個鬼火咁靚嘅巫婆，呢條畫滿星星、月亮、南瓜、蝙蝠嘅巫婆裙會係首選。除靚靚巫婆裙外，套裝重包埋巫婆帽、腰帶、恤衫，加多把飛天掃帚就Perfect啦！
售價：$290（c）
多款面具驚嚇搞鬼任你揀
旨在湊吓熱鬧，想學人扮鬼扮馬又唔想太誇張，簡簡單單戴個面具就最好不過。講到面具，款式就更加多不勝數，由夜光吸血鬼、骷髏頭等驚嚇樣，到搞笑拉登都有，價錢豐儉由人，咁多款揀，想扮乜都得！
「裝胸」作勢大隻佬
唔扮鬼重有好多造型可以玩，扮大隻佬又如何？戴上呢個擁有六嚿胸肌同腹肌嘅假身，唔使日日做Gym都可以變Rocky。最抵死係心口中間有埋胸毛，咁Man，肯定引死靚女。
售價：$38（b）
飛天小女警
《飛天小女警》內，三個大眼主角服式任你揀。全套有眼罩、裙，就連假髮同腳套都齊備，真真正正由頭扮到落腳。有大中細三個Size，可以畀小朋友一嘗做飛天小女警的滋味。
售價：$590（c）
千年骷髏頭
呢款千年骷髏頭，面容枯乾重纏住裹屍布，下身加件黑袍，十足十千年骷髏骨，夜晚見到都咪話唔嚇破膽。
售價：$165（c）
至「螢」夜光吸血鬼
吸血鬼面具，兩隻染血殭屍牙加埋猙獰面目，用上螢光物料製成，夜晚戴去Wet實「螢」盡全場。襯埋大紅衫領，造型夠晒出位。
售價：$28（b）
骷髏骨頭都玩Punk
呢款骷髏頭擺明玩Punk，粉紅雞冠頭加副超，賣相騎呢得嚟又幾鬼煞食，今年唔想再玩「奪命狂呼」樣，不妨諗諗呢款。
售價：$29（a）
骷髏面具玩爆炸頭
呢款爆炸頭造型嘅骷髏頭面具，骷髏面連住一大把顏色爆炸頭，雖然驚嚇度唔係好高，但勝在夠型仔，重好有Rock味，夠晒特別。
售價：$190（c)
逼真道具造型更神似
着住殭屍袍唔似殭屍，戴住巫婆帽又唔多似巫婆？原因係你尚欠道具在手，無一兩件襯番個造型，點扮都總係差少少。不妨買番件道具，好似白骨手套、鬼爪等，再襯番一身特別造型，咁先夠神似嘛！
拉登至爆笑
講恐怖，邊個及呢位仁兄？拉登出晒名係「恐怖」分子，萬聖節又點可以無佢份？面具個樣雖然變肥咗又Cute咗，但着埋件白袍，相信效果都唔錯。面具用綁橡筋式戴法，無咁焗。
售價：$48（b）
巫婆面具遮剩個嘴
成晚戴住個面具，想開餐或者飲兩杯都幾麻煩。建議買呢個遮剩個嘴嘅巫婆面具，面具只遮到上唇位置，就算戴住都可以飲飲食食，夠晒方便。
售價：$48（b）
發聲巫婆掃帚
呢把縮水巫婆掃帚裝有感應器，只要一感應到有聲，就會發出巫婆笑聲，比普通禾稈草掃帚好玩得多。掃帚上有個巫婆樣，玩完重可以掛上牆做裝飾。
售價：$30（a）
殺人鬼爪
「猛鬼街」主角Freddy，殺人唔眨眼，想演活呢個經典恐怖人物，第一時間梗係要買番隻鐵爪手套，加埋件紅黑粗間衫同皮帽，包保似到十足。
售價：$15（a）
殭屍至愛血包
雖然血漿似茄汁多啲，但勝在包裝似模似樣。血包頂部可打開，可自己插入透明膠喉，咁就似足醫院用血包，買包扮吸血殭屍，都幾搞笑。
售價：$168（e）
閃燈骷髏魔手套
呢對滿手珠光寶氣嘅骷髏魔手套，只要開掣，骷髏頭戒指兩隻眼就會發出紅光，加埋立體效果，造型夠晒突出。
售價：$35（a）
斬妖伸縮劍
大人揸血刀，小朋友最好就係揀呢把斬妖劍。劍身可伸長縮短，重可以着燈，扮小武士，手執斬妖除魔劍，重邊有鬼怪敢埋身。
售價：$19.9（d）
嬌俏巫婆帽
最新款巫婆帽，打破傳統烏卒卒嘅顏色，改以蜘蛛網襯鮮紅色，賣相富新鮮感。今年想一改形象做個靚靚巫婆，揀呢款就最適合不過。
售價：$35（b）
售賣點：
(a）生意滔
旺角洗衣街127號C地舖（水務署對面）
34223101
(b）金輝玩具
旺角弼街73號地下
23903337
(c）LCX
尖沙嘴海港城三樓
31023668
(d）玩具反斗城
尖沙嘴海運大廈地面OTG23號舖
29916222
(e）JCShop
銅鑼灣時代廣場8樓833舖
31022783
科學怪人大腳板
呢對科學怪人大腳板，雖然造型唔係十分逼真，但自己再做少少手腳，唧血漿上去或者加條道具鎖鏈球，相信效果會唔錯。
售價：$45（a）
殺人狂魔血刀
呢兩把長、短血劍，郁一郁血漿就會在刀上流個不停，乃扮殺人狂魔必備道具。廿蚊有找，玩完重可以留番下年玩。
售價：$15（大）$12（小）（a）
的骰魔鬼叉及斧頭
呢兩款紅魔鬼叉同斧頭，釘上珠片、毛毛同絲帶，買嚟出席較隆重嘅Party就最啱。
售價：$35/支（b）