數碼影音：數碼錢包愈玩愈High<br>播片聽歌兼打機

數碼影音：數碼錢包愈玩愈High
播片聽歌兼打機

𠵱家任何產品都講求多用途，獨沽一味再行唔通，好似DigitalWallet一類產品，淨係插卡睇相已經再無新意，要創新才有前途。ARCHOS之前已推出過可接駁鏡頭機種，今次推出新機Gmini400更加入埋遊戲玩法，當中遊戲更唔係簡單Game仔，唔夠玩重可以上網下載，用落就好似拎住部強化版GameBoy出街一樣。
記者：許福合
攝影：陳盛臣
ImageGirl：Carman

手提遊戲機畫面聲畫效果愈來愈好，雖然Gmini400並唔係一部全職遊戲機，不過當一入到遊戲部份，自自然然會歎一句「好正」，筆者試玩嘅機身已裝好5款遊戲。論畫面可能未及現時新一代遊戲機，不過其可玩性亦相當可觀，有點似初代手提遊戲機。玩落令人非常回味，而操控上亦相當不俗。機身設有全方位十字掣，另加上2個按鍵操控，手感同一般遊戲機分別不大。機內遊戲玩到悶，又可到ARCHOS網頁下載新Games，分別會有免費或遊戲試玩版，種類由接龍、賽車、動作到射擊都有，大家不妨到以下網址試玩。

網址：www.archos.com/products/games_list.html

■$3,480

■機身並未有喇叭，需要接上耳筒收聽。

■8方向十字掣，手感同遊戲機分別唔大。

■遊戲唔算複雜，兩個按鍵就夠玩。

直錄MP3睇埋封套
講到Gmini400機身，更係出奇地細，只係一般MP3機大些少，若果同硬碟型MP3相比，更係相差無幾，所以當作MP3機咁玩一定無問題。機身內置有20GB，可播放及儲存長達300小時嘅MP3/WMA/WAV音樂，透過可顯示中文嘅彩色LCD，加埋張唱碟封面作識別都得。此機還直接內置有MP3直錄功能，可直駁Discman將音樂錄製成MP3檔，質素高兼且慳位，另外，內置咪高峯亦可作為錄音之用，功能相當齊全。

■機身非常細，只有一個手掌大小。

■機頂設有指示燈，可知操作情況。

■可設定好唱片封面，跟隨歌曲顯示出來。

■播片時還可選擇速度、定鏡等功能。

影音功能強勁
Gmini400集合多種影音功能，除咗錄製MP3外，用家還可預先將DVD轉換成MPEG4下載至機內，隨時隨地欣賞。由於流暢度高，加上靚芒，質素絕對可媲美一般DVD機，片長更可達80小時。攝影玩家更可當作儲存相片之用，機身已內置CF插槽，可即時快速查看相片。由於用上圖像化介面，容易上手，存放大量檔案都唔會混亂。電池可連續播片5個鐘，一般音樂播放亦有10個鐘，好耐用！