公關大姐大攞獎，眾老友到西苑食飯，賀佢一賀。近日之公關大笑話當然係特首記者招待會（宣布周一嶽做局長），問大姐大有乜評語，大姐大為人謙厚，笑而不言，另外一位大姐C小姐就話：「唔好鬧蔡瑩璧啦，新聞處長都係奉命行事嘅啫。」才子T就話：「跟住個咁嘅老闆，乜人都死，呢，最近佢又話公務員改革一事，佢好耐冇講過嘞。」
「我好耐冇講過」，似曾相識，大家相視而笑。大姐C話：「唔好再講呢樣咯，好悶啫。呢，我朋友個女，行年二十五，冇男朋友，要我介紹男仔，大家請幫忙。」此語一出，場面偉大咯，人人爭住講。才子T太太話：「唉吔，過咗聖誕前夕，就冇人送禮物㗎嘞；女仔慶祝完二十五歲生日，亦都收唔到花！」最美麗祖母Y女士話：「唔係啩，過埋大除夕，咪重冇人吼？」
H先生答：「嗱，我個大仔有好多人吼，唔少父母打電話嚟約我個仔食飯，介紹佢哋嘅千金。但我嘅二女就冇人搵出街噃。我已經教人哋個女要維持女士尊嚴，唔好輕易同男仔去街，但係教自己個女要主動出擊，以快打慢，否則過完聖誕好快就到新年！」
咁都得，乜男仔咁渴市呀？賓架C兩夫婦猛咁咪咪嘴笑，因為佢哋有兩個仔，冇女，驚都未驚過！估唔到今時今日，為人父母嘅，會為女兒擔心，驚佢哋嫁唔出，究竟道理何在呢？實在諗唔明。講講吓，似乎得出一個結論，就係二十零歲嘅男女之中，女仔讀書叻（平均計），做事亦下下壓住男仔，而男仔追女仔，取易不取難，最唔鍾意搵一個比自己醒嘅、比自己高級嘅女仔。於是各位老友，家有千金嘅，無不為女頭痛。