任葆琳前晚着住低胸粉藍色晚裝去ball，重露出大片滑溜玉背，非常性感。但佢呢件價值約二萬五千蚊嘅Chloe新裝，之前陳慧琳同張玉珊都着過，所以新鮮感就真係欠奉！
就現場所見，任葆琳玉背上有個泳衣印，重係蝴蝶形㖭，佢話：「我前幾日走去石澳曬太陽，點知瞓着咗，曬足一個鐘頭，咪曬出個泳衣印，不過咁啱又好似蝴蝶咁，幾得意，所以可以騷一騷。」
問任葆琳點解唔索性解開泳衣帶曬背？佢笑笑口咁話：「我個人好爛瞓，我怕瞓着咗，到時反咗身咪弊，都係唔敢囉！」至於近況，任葆琳話近期忙於返內地工作，同埋間中返台灣探親。
關之琳早前被傳同台灣藝人小馬有新戀情，小馬噚日喺台灣接受訪問時，話自己好有魅力，之前嘅中秋節，佢哋重互傳短訊傳情㖭！
小馬話：「我是那種眼睛主宰腦袋的人，看到美女，說出來的笑話就會特別好笑，阿關（關之琳）很愛聽我說笑，還為我取名『康樂組長』。」
梁漢文（Edmond）早排拍攝新歌《艦隊》MV時，邀請咗個演奏樂團參與演出，不過導演當日臨時要求所有樂手浸喺水裏面拍攝，搞到Edmond非常唔好意思，佢話：「成班演奏隊着晒靚衫演出，佢哋啲樂器就係搵食工具，如果俾水浸濕咗就唔係咁好啦。」
咁又係嘅，唔怪得之Edmond話嗰日負責「睇水」啦！
組合Boy'Z噚日喺灣仔拍攝Nikon相機廣告，佢哋每人重獲贈一部相機。拍攝現場放咗好多裸男裸女嘅相，Boy'Z見到啲相就話自己身材唔夠弗，所以唔敢影呢類相，而成員Steven重自爆唔鍾意着三角泳褲，覺得好唔舒服喎！
不過Boy'Z異口同聲話𠵱家好努力咁游水同跑步減肥，希望身體更加健碩咁話！
關寶慧喺電影《雙子》入面飾演一名妓女，佢話今次嘅演出有唔少內心戲，所以都幾難演，尤其係其中一幕話佢俾一個日本妹整蠱，令關寶慧嘅男朋友見到佢接客，搞到關寶慧好唔開心，不過佢覺得都幾有挑戰性，可以磨練吓演技嘛！
