超高價賣地事件似未能為股市帶來刺激，尤其係地產股表現亦唔好，除咗傳聞會批股的信和置業（083）股價再升上今年高位之外，唔少都報跌。
信置噚日最高見過7元，收6.85元，逆市升6.2%，成交股數4119萬股，金額2.8億元。個價咁靚都唔心郁搞批股，實在好難令人置信。
至於噚日停牌，提出全面收購依利安達（033）的建滔化工（148），又趁消息搞批股，話要籌集資金準備全購之用。經紀黃話覺得奇怪，收購成功與否都未知，咁快就搞批股，似乎心急咗多少喎。
建滔以每股14.70元，配售6500萬股，集資額9.56億元。雖然話有消息跟尾，但經紀黃就話唔敢要，佢話一來批股價折讓只係3.92%，唔算便宜；二來近排批股嘅股份，除晶門科技（2878）落入大戶手上，股價企硬之外，其餘大成生化（809）同埋裕元（551）都跌穿批股價，加上大市氣氛又麻麻，都係多一事不如少一事。反而被收購的對象依利安達，今日復牌股價就必升無疑。
慕容小初