兩幅地皮爆燈價成交，個市卻以下跌來反應。兩個買地主角長實（001）與新地（016），分別下跌1.25元與0.50元。如果話驚住樓市見頂，則又解釋唔到信置（083）點解會升6.2%。
恒指C輪：恒指最多散過157點，低見13093，埋單跌80點，冇咁肉酸，即月期指跌28點，低水5點唔算壞。恒指C輪9911高低波幅15%，博長實、新地反彈拉番高個市，低位撈啲9911。由昨日波幅睇嚟，炒9911（同埋其他恒指C輪），可能比較適合炒出炒入，買咗之後睇中方向，有得執時先要執，等跌番之時又再買番，實行密食當三番。
國壽C輪：國壽（2628）收5.05元，冇升冇跌。但隻熱門C輪2143則散咗9%，收26仙，唔見2.5仙。接近20倍槓桿率嘅C輪，爆炸力同殺傷力都好大。國壽1個價位5仙變動，隻輪跟住變動2-3仙（好啱數），即代表10%上落；國壽變動10仙，隻輪有權變動4-5仙，即係代表20%波幅。國壽5元守得穩，2143低位可博。隻輪明年1月到期，溢價8.1%，槓桿率19.4倍（有效9.0倍），引伸波幅33.5%。
國壽C輪9231，已到末期階段，下月4日最後買賣，已經平水，槓桿率11.6倍，未來幾日會飛沙走石，心血少啲都唔啱玩。
中銀C輪：中銀（2388）收14.10元，低過前市1格，再低啲，收集C輪9169，隻輪明年2月到期，輪價19仙，溢價1.3%，槓桿率7.4倍（有效6.4倍），引伸波幅20.8%。中銀股價通常唔會大跳動，所以C輪溢價亦較低。
章盛