九年前，伊芬鶴基（EthanHawke）同《藍白紅三部曲之白》女星茱莉蝶兒（JulieDelpy）喺電影《情留半天》發生浪漫一夜情，令影迷回味無窮。九年後導演李察連卡特（RichardLinklater）再同佢哋合作拍咗續集《日落巴黎》，延續浪漫情緣。
喺《日落巴黎》入面，伊芬已成為有名有利嘅作家，去巴黎出席新書簽名會時，發現茱莉有嚟捧場。呢對似曾相愛嘅男女重遇後雀躍萬分。但已有妻兒嘅伊芬要搭日落前嗰班機飛返紐約，兩人就喺短短午後蹓躂巴黎嘅花園、咖啡座同塞納河，互訴九年間嘅一切。茱莉更喺片中對住伊芬彈木結他，令伊芬非常心醉。
早排以《阿Sir嚟自樂人谷》獲得理想票房嘅導演李察連卡特，噚日喺美國接受我大口羅拉越洋電話訪問，佢話：「三年前我同茱莉、伊芬合作《WakingLife》嗰陣，已經諗過開拍《日》片續集。最先係茱莉寫咗好多有趣嘅對白，然後伊芬回應，跟住我哋三個一齊完成個劇本。」
導演重話：「片中大量對白都係出自兩個主角嘅手筆，令部戲充滿濃厚嘅自傳色彩。呢部係反傳統荷李活愛情片嘅電影，有多個場面都係主角連續喺同一場景做六、七分鐘對手戲。」