正當泛民主派重喺度「協調」緊批唔批准梁家傑入行政會議，點知阿董呢頭經已公布新人選，新早餐派嘅陳智思同埋得蒙中方睇起過嘅查史美倫，雙雙入局，知情人士通報，呢步棋，以董團夥嘅智力，根本無從諗起，係有中方在上喝令督卒上馬，先至爆個冷門。
皆因為喺泛民主派僅取得二十五席之後，阿董以為經已大獲全勝，所以至講咗句「選舉結果好Comfortable」嘅無厘頭笑話。語音未落，就俾劉慧卿發動小型政變得手。
新早餐派泛聯盟同土共，都唔妥中指黃，財委會主席落在卿姐手上。中方如夢初醒，先知道立法會內確有個泛聯盟嘅「陰陽界四五行動組織」，雖然得嗰四五個人，但左右踩界，可以毋須畀面中董當局，鍾意起上嚟就跟大班肥詹佢哋起旗，所以有關人士下令阿董，快手擸番件陳智思招安入局。
至於查史，就更係一隻黑馬。皆因環顧全港，冇一個人曾經直達北京，唔係做政協副主席之類嘅花瓶，而係幫阿公主持股市。查史做過大陸證監話事人，久經大陸考驗，特別係中央高層暗中觀察，睇吓做呢個位嘅人會唔會收水做市。查太喺上高，就因為執法公正，冇人可以使橫手搵食，遭到大陸股市維園阿伯謾罵，話點解搵唔到水咁講。經考驗證明，查太堅持法治，唔要人治，抵制不法行為，甚得領導人賞識。入行政會議只不過係第一步，下一任政府，至少係政務司司長人選。
查史美倫又屬中產階級，英文流利，萬一同長毛用英語舌戰，討論股市同生產力唯物辯論法嘅互動英語，分分鐘唔輸過布殊對Kerry。七年來佢一直低調，本牛皮簿一啲都冇花，唔似一啲人，中環及馬會包廂一傳佢上位，周圍就有好多人爭相向佢抹黑吐口水。因此中央又透過北京嘅低級官員下令阿董，一定要質查史美倫入局，係唔可以SayNo。查史若果上到位，形象純情聖潔。中方重有一層算盤，就係可以成功挫低另一與麻雀牌數字有關嘅女強人，破埋佢之笑音魔法，一石三四鳥嘅政治用心，董團夥啲「智囊」又點夠班呢又。
傳真︰2623-9278
電郵︰