昨日賣地成績真係正到你唔信，點解兩大發展商肯以天價購入地皮？小初呢類蟻民真係唔明白佢哋點計，但就開始擔心佢哋搞高晒啲樓價，日後唔夠錢買樓。
兩幅地皮以高價成交，至於會唔會刺激地產股股價上升就兩睇，但肯定就有利美聯物業（1200），皆因無論係樓市炒家借機炒作抑或係買家趕住入市，佢哋都必定會增加生意，所以噚日一眾地產股冇乜反應之際，美聯已率先炒上，全日升5.56%，收3.325元，成交股數2310萬股，金額7492萬元，無驚無險又創52周新高。
美聯之前發出盈利警告，但收尾業績其實好靚仔一事，激親唔少投資者，但同時又有其他芬佬垂青，所以一樣可以炒到㷫烚烚。
另外，繼日前大成生化（809）同埋晶門科技（2878）配股後，噚日又輪到裕元集團（551）大股東減持，睇嚟市況轉旺，集資熱潮將停不了。
晶門噚日股價並無受到大影響，微升唔夠0.5%，收1.99元。經紀黃話，據講晶門創投基金減持的股份，悉數落在大戶手上，所以股價表現咁硬淨。
慕容小初