鄧建泓：降Grade都要唱
馮仁昭四圍超：薛凱琪、吳浩康新人排位稱王

一班新進歌手前晚喺將軍澳電視廣播城錄影台慶節目《力量更強邁進38年》其中《男女角力唱》嘅環節，當中睇排位，就知邊個被無綫重視。為無綫拍過《學警雄心》嘅吳浩康同薛凱琪（Fiona）大部份時間都被安排企前排同中間位，得寵程度係新人之冠，反而出道多年的鄧健泓（Patrick）就多數企後方。

鄭融甘靠邊站
Fiona今年係第一年參與台慶，企到個咁靚嘅位，心情梗係興奮啦，Fiona話：「幫無綫做大騷係我嘅目標，企中間都有壓力㗎，唔好話搶唔搶鏡，有乜做錯就重搶！」只可以企側邊位嘅鄭融，見佢面色唔多好睇咁，佢就話自己鼻敏感唔舒服，至於冇得企中間，鄭融話：「冇所謂，個個都企中間，邊個企側邊？」
Patrick則酸溜溜咁話：「有得唱都OK，降grade都冇所謂，無綫係我經理人，叫做冇唔記得我，自己仔女都應該嚟充撐場面，老實講我想搵錢啫，有得做我咪做囉，我冇唔開心喎。」
同樣一早唔係新人嘅吳浩康，相對較被重視，不過佢就話：「唔關事，大家都係歌手，對我嚟講每日都係新出發。」

松松險墮銀行假網
近排網上有唔少假銀行網頁出現，一唔小心真係分分鐘會中招。好似陳松伶咁，近日佢收到一個聲稱係滙豐銀行嘅電郵，話由於銀行網站需要升級，要求松松重新輸入佢喺銀行嘅個人資料，松松覺得事有蹺蹊，於是打電話向滙豐了解，先知道嗰個係假網頁，好彩冇中到招咋！

克勤安仔針鋒相對見面互寸
李克勤最近俾網友投票為《勁歌金曲》「最受歡迎男歌手」嘅大熱，克勤同許志安噚日喺無綫相遇，安仔好寸咁話：「跑馬咩？自己都好想阻止佢三連霸。」克勤話佢哋係明爭明鬥。安仔又話：「我畀定支潤手霜你，等你跣手跌咗個獎，我執咗你個獎就成世唔放手㗎啦。我阿爸成日買馬，買埋啲頂頭大熱，但成日跑唔出。」

田亮拒談入娛圈傳聞
噚日有報道話田亮喺兩個星期之內落實簽英皇，又話佢經理人承認咗呢件事，國家體委亦答應放人，而網上重有消息話田亮日前喺內地一個活動都話有興趣試吓做娛樂圈。噚日馮仁昭打電話畀田亮，但問佢乜佢都話「不能回答」，問佢係咪真係講過話有興趣做娛樂圈，佢話自己冇睇過報道，所以唔可以答，重申所有問題都要國家體委批准至可以回答。

劉皇發添第五個孫
「新界地王」劉皇發新添第五個孫，第二個新抱畢麗君噚日喺伊利沙伯醫院，剖腹生咗七磅幾嘅女嬰，舉家上下都開心啦。劉皇發太太吳妹珠喺電話度話：「BB下晝出世，呢胎一樣係女，英文名就由佢爹哋改，中文名就發叔改，發叔最鍾意孫仔、孫女。」劉太就因身體欠佳，未到醫院探望。