兩幅地皮以超高價成交，且買家係大嘅地產商新地（016）同長實（001）。恒指是日跌53點，未反映賣地成績。除非昨晚外圍股市唔妥，否則港股應該有機會彈升。
新地C輪：新地買地，新地C輪2252成為輪王，指成交金額。隻輪成交349球，大增兩倍半，創歷來最多不在話下，金額1.71億元，大過晒其他窩輪，包括成日霸頭位嘅恒指輪。成交超過發行量244球嘅43%，好多人炒即市搵食。新地收75.25元，升50仙；2252收51仙，升1.5仙。新地睇升，2252繼續會有炒作，上月最高價74仙，大把水位。新地另1隻成交較疏嘅C輪2151，溢價同槓桿率等其實更靚，載於走勢圖內，更加係博得過之選。
恒指C輪：6隻最大成交嘅恒指C輪中，4442跌4.1%，其他5隻跌幅2.6%至3.5%。賣地成績帶起個市，揸恒指C輪有運行，4442跌得多過同類輪，博反彈搵呢件。
呢隻係長命輪，明年3月到期，鍾意炒短期啲嘅恒指C輪，則應該揀9911，隻輪年底到期，輪價19仙，溢價只係1.3%，槓桿率16.2倍（有效11.7倍），呢組數字好吸引，而引伸波幅18.9%亦都夠晒低。
電盈C輪：電盈（008）最低4.95元，最高5元，其實相當穩定，收5元，冇升跌，但隻最熱門C輪9814則最低32仙，收33.5仙，散11.8%。隻輪明年1月到期，溢價6.5%，槓桿率14.9倍（有效8.1倍），引伸波幅31.4%，正股冇郁而佢散落去，溢價收縮，不妨細細注博反彈。
章盛