陳智思爆冷跑咗出嚟做行會成員，好多人之前都唔敢落注，皆因陳智思太年輕，以為佢未夠班，其實呢位太子爺斯斯文文，從不張揚，但係密密做嘢，真係名副其實嘅「鴨子划水」，上面唔見郁，下面猛咁爬。
不過有新面孔，始終係好事。當然榮升行會成員，一言一行要倍加小心，Bernard噚日就通知新城電台嘅郭艷明，話畀佢知唔知以後可唔可以同佢及蔣麗莉一齊，星期六喺才俊群英會開咪做節目，如果老董批准，就幾新鮮。
另外，正治療腸癌嘅民建聯主席馬力噚日同記者茶敍，講到自已嘅病況，有記者問佢做唔做得完四年任期，佢笑住話，如果病發身亡就做唔完，醫生話佢要做六個化療療程，𠵱家做緊第二期，所以成日要返廣州醫病。
（圖）郭艷明（右）擔心陳智思（中）再唔可以喺新城開咪，左為蔣麗莉。
傳真︰2623-9278
電郵︰