港府賣地，創出拍賣時間最長嘅紀錄，何文田地總共用咗1小時50分鐘才賣出，成價94.2億元，遠比市場最樂觀預測的72億元為高，看來發展商真係好「餓地」。
不過，賣地雖然好「墟冚」，但股市唔單止毫不為所動，地價一路升，股價就一路跌，臨尾期指重質多一轉，結果恒指收13251，跌53點；期指跌穿13200大關，收13194，低水57點。經驗告訴我們，每逢賣地，唔理係好價抑或唔好價，股市九成九都會下跌，噚日更加係最好嘅證明。
國企跟大市調整，原料股跌勢頗急，表現最突出係吉林化工（368），最高1.81元，收1.78元，升5.95%，成交更大增至接近1億股，係今年3月2日以來的最高紀錄，動力行先，相信在1.9元水平略作整固後，可破位而上，創出97年中以來新高。早前推介吉化，估計04年全年盈利達16億元人民幣，大升2.73倍，每股盈利0.42港元，以短期目標2.2元計，PE只係5.2倍。
安德利果汁（8259）在5個交易日內，由0.87元急升到1.09元，升幅25%，噚日略作整固，回收1.05元，形成旗形，再破位而上，初步目標指向1.22元，短線有可炒之機，中線持有，以1年為期，更有機會獲利4至5成。
安德利係中國最大規模的濃縮果汁生產商，亦係全球最主要的供應商，04年度（12月年結）每股盈利7仙計，PE15倍，以基金股而言，屬在合理水平，但05年每股盈利9仙，06年更可大增到12仙，則以15倍PE計，股價已可見1.8元。
集團目前有多項發展計劃，最「煞食」係合資經營果膠廠，預期可於06年投產，首年產量3000噸，08年可達6000噸，營業額6億元人民幣，毛利率高達50%。另外，集團將旗下龍口安德利10%股本轉讓予日本三井，藉此拓展日本市場，期望2至3年內對日本市場銷售份額可提升到10%。
安德利管理層對公司前景信心十足，集團總裁最近從韓國股東收購16.77%股權，成為第2大股東，而大股東光彩事業仍持有32.21%，加上基金持有之數，街外流通的H股數量並不多，貨源不斷歸邊後，股價上升空間會更大。
郭兆誠