今年最矚目一次賣地，噚日舉行，何文田天光道地皮，登上九七後地王寶座，足足用咗兩粒鐘至賣得出，拍賣官想早啲收工都唔得。
喺買家承價至八十二億二時，拍賣官已經叫過「第一次」，準備等冇人再出價，就叫埋「第二次」同「第三次」，賣咗幅地，點知，有二十幾輪叫完「第一次」之後，就即刻有買家承價，計埋近三十趟至成功扑槌。
拍賣官羅思善噚日用「磨爛席」伎倆，成功以高價售出地皮。但另一方面，佢拍地時，就唔止一次「跳價」，就好似拍賣首幅何文田地皮時，叫價到五十九億六時，八號牌呢頭舉起，拍賣官就即刻問有冇人承六十億，點知二十八號牌又即刻承，就係咁，賣地官就跳咗五十九億八嗰口價。唔知係發展商出價太踴躍，抑或係拍賣官另一個叫價伎倆。
噚日土地拍賣，除咗各大地產商、地產經紀、分析員同埋大批記者到場外，亦嚟咗一批稀客。約莫三十多名新亞中學學生，由學校方面安排，着晒整齊校服，到場觀戰，實地觀察大地產商，如何一擲億金投地，可謂眼界大開。
不過，在場投地嘅地產商，代表眾多，相信班學生哥都唔知道邊個打邊個。
除咗佢哋外，重有一批身穿便服嘅年輕人到場，相信係大學生，同埋一批自由行客，佢哋斷估唔到，嚟文化中心，竟然可以觀看到一場本港世紀之戰，可謂意外收穫。
今次咁盛大嘅賣地場面，連嚟香港散心探朋友嘅英國遊客，噚日行過文化中心時，都被吸引嚟觀賞一番，正值何文田地拍到一半左右時候入場，重一直睇到幅地成功賣出至離場。蘭西當然即刻問佢幾句啦。其中MrBarton話，佢都係第一次喺香港睇賣地，覺得氣氛幾好吖，但個價錢就veryhigh嘞。之後重好樂意叫朋友一齊，畀蘭西影番張大合照留念。
另外，現場有一批對樓市好鬼關心嘅二手業主，噚日亦專登趕嚟，喺賣地場外邊睇電視直播，感受吓個樓市有幾熾熱。當競投價到超乎預期水平，在場業主頻頻講電話，同經紀講一係封盤、一係加價。
噚日拍地，多家發展商高層都到場，恒基地產太子李家誠，由高層黃浩明陪同到場，雖然恒基都有出手競投，但最終落敗。
李家誠近期人氣大熱，除咗因為西灣河嘉亨灣賣得好之外，最主要都係佢同藝人徐子淇嘅戀情，好多人關心。
喺拍地期間，佢曾經一度離場，出咗外面一陣，有人就猜測，佢係打電話畀徐小姐，最後因為冇人問佢而不了了之。
噚日成百億成交嘅何文田地皮，喺拍賣過程中，見到bid價不斷咁突破市場預期，發展商一直唔敢離開座位，慌死錯過最後拍賣官扑槌嗰一刻，成為一生遺憾。點知幅地卻拍咗成兩個鐘，搞到佢哋全部變晒忍者，「忍—忍—忍—忍」。
所以當拍賣官扑槌成交嗰刻，佢哋都即刻起身出去鬆一鬆，去洗手間。
蘭西咁啱撞正新世界堅叔，當然問係唔係佢哋投咗幅地，以及點睇個價啦，堅叔好鬼馬咁話：「如果係我哋投咗，走佬都唔掂呀！」
每次賣地，發展商都會入場坐定定，噚日就可能因為兩幅地太過矚目，有啲發展商都做兩手準備，好似新地咁，由新地代埋執行董事雷霆，喺場內負責投地，而總經理周國賢，就喺外面猛打電話，唔知係咪即場報料畀老闆知，最新戰況係點。
蘭西見到周國賢唔得閒，都冇阻佢。不過，佢一見第二幅地賣完，就即刻匆匆走人，可能係唔想畀行家問，佢哋公司係咪投到第二幅地啩。
嘉華國際主席呂志和，噚日親臨現場督師，佢老人家戴住頂帽進場，都幾搶眼。
嘉華喺第一場何文田地王戰之中，開首都有積極參戰，投到五十九億後就退出。
呂志和雖然坐足全場，但不時用紙當扇搖，顯得有點不耐煩，最後佢哋一幅地都投唔到。
噚日賣地，吸引好多唔係投地嘅人到場，計落分分鐘多過發展商，淨係地產代理，四大代理行都派咗好多人去，中原老闆施永青都有到場。但佢似乎覺得戰況沉悶，中途見佢打開份報紙，係咁睇。
蘭西
電郵地址：
