做咗阿媽冇耐嘅金像影后姬妮芙柏露（GwynethPaltrow），最近準備同樂隊Coldplay主音老公ChrisMartin同愛女艾普（Apple），齊齊搬入倫敦一間豪宅居住。不過，聽聞呢間屋好鬼陰森恐怖，之前嘅住客亦厄運重重，睇嚟姬妮芙一家三口都要小心啲啦！
姬妮芙最近用咗四千五百萬港紙，喺倫敦買咗一間豪宅，雖然上一手業主係好友琦溫斯莉（KateWinslet）同佢嘅導演老公森文達斯（SamMendes），但住喺嗰頭班師奶一聽見間屋，即刻腳震震。
其中一位鄰居爆料話：「喺姬妮芙同Chris重新裝修間屋之前，間屋已經有啲古怪，𠵱家間屋仍然有啲令人不寒而慄嘅感覺，以前啲住客都試過有唔吉利嘅嘢發生，所以佢哋都好想賣咗間屋。而肥溫同佢老公都住得唔長，相信佢哋都知道間屋有問題。」
不過如果肥溫知道嗰間係凶屋都唔單聲畀姬妮芙聽，咁就真係唔夠老友喎！照咁睇嚟，姬妮芙除咗要請個保母照顧個女之外，最好都係搵個驅魔人搞搞間屋好啲。