繼DBS星展銀行嘅保管箱事件令國際銀行界目瞪口呆之後，香港特區政府竟然自編自導自演一套笑刺肚皮大喜劇，「四時令五時改」，十月七日下午四時零八分話要開記者招待會宣布接替楊永強嘅人選，五時零四分竟然宣布因程序問題而取消，特首辦、新聞處倒瀉籮蟹，射波入自己龍門，係唔係林煥光、蔡瑩璧都食錯藥呀？咁烏龍嘅事件，相信係世界所無（非洲小國有冇試過就唔知），貽笑大方。
周一嶽做衞生福利及食物局局長，卒之喺十月八日下午六時十五分宣布。醫療界盛傳楊永強並無向董特首推薦周一嶽，係董特首自己堅持嘅。周醫生以前爭做醫管局行政總裁，輸畀另一位得到楊永強大力支持嘅何兆煒，𠵱家竟然得貴人扶助，踩油爬頭，做番何兆煒嘅太上皇，將來會有戲睇。
周一嶽呢個名字都幾有傲氣，周家兄弟以「一」為名，佢嘅二哥叫做周一彪（內科醫生），佢叫做周一嶽，相信為以攀上高峯為志向，父母對佢期望甚高。嶽者，高山也，中國有五嶽，東嶽泰山（山東）、西嶽華山（陝西）、南嶽衡山（湖南）、北嶽恒山（山西）、中嶽嵩山（河南），最出名嘅當然係泰山，而武俠小說一定提到華山（論劍），以及嵩山（少林寺），反而最高嘅恒山（二○一七米）就好少人提，衡山亦冇乜人講，除咗旅遊人士之外。
做人咯喎，做齊五嶽當然冇可能，做到「一嶽」已經好了不起，周一嶽與楊永強在港大醫學院同班，雖然以前楊永強支持師弟何而唔支持佢，亦唔向董特首舉薦，卒之都可以過吓局長癮，可惜只係得兩年幾任期啫，不過都算登上一嶽，攀登人生高峯吖。上到嶽頂之後，空氣稀薄，以後要小心呀。