大市在窄幅內拉鋸，上升股（不計認股證）比下跌股隻多，國企、個別賭場概念股和實力二三線股有較佳表現，恒指尾市搶高，收13305，升63點；國指收4795，升24點。
銀建國際（171）調整完成，升浪再起，傳呢個月之內會有消息，大股東信達繼上次注入569億元人民幣嘅不良資產後，好快會注入另一批「晒士」再大幾倍嘅資產。早前已經同銀建計過條數，1個「包」每年已可賺幾億元，再多1個「包」，又賺多十億八億元，家吓銀建市值只係38億元，即使股價升上4元樓上，PE重係好低！銀建噚日收2.475元，升7.6%。
另外，早輪推介過隻新海能源（342），家吓又有新動作，就係10合1，聽聞係應基金要求。新海其實係基金成份好重嘅股份，夾埋起碼佔發行股數3至4成，合股之後，加上業績又對辦，股價不難升上2字頭之上。
保險股近期表現頗為硬朗，平安保險（2318）、中國人壽（2628）同人保財險（2328）都有進帳。國壽收5.15元，升近2%，成交總值約2億元，係3隻之中最多嘅，亦可見好淡爭持得幾激烈。
家吓國壽嘅阻力位在5.25元，近1個月來，3次上衝都受阻而回，今次係第4次，只要再出現更大成交（例如比噚日的3900多萬股倍增至8000多萬股），破位而上嘅機會就好大，而大升浪亦會展開，初步上升目標指向5.8元。
內地息口趨勢，以及企業投資政策的改變，對國壽都好有利。近日，內地銀行已向國壽提供1個較高的存款息率，回報按年計可達3.8至4厘，比國壽上半年的回報率3.2厘為高。
另外，預期監管當局即將容許保險公司直接投資內地股市，除了可提高投資回報率之外，亦可分散投資風險。
國壽在宣布中期業績後，獲多家大行提高評級及目標價至6元。摩根大通近期分別兩次增持合共6100多萬股，平均價約5.15元，亦即現價水平。
大行揸重貨，必有智珠在握，等突破5.25元立即追進，跟炒一轉。
重有，國壽正同準策略投資者洽商中，有消息話短期內會落實，對股價會有刺激。
郭兆誠